बाँके मंसिर २६ गते । सरकारले घोषणा गरेको नेपाल भ्रमण वर्ष सन् २०२० लाई सफल बनाउन प्रदेश नं. ५ सरकारले पनि तयारी थालेको छ ।
केन्द्र सरकारले जनवरी ७ गते भ्रमण वर्षको औपचारिक उद्घाटन गर्ने जनाएको छ, तर प्रदेश सरकारले जनवरी १ गते नै बर्दियाको ठाकुरद्धारामा एक भब्य कार्यक्रम गरी भम्रण वर्षको शुभारम्भ गर्ने तयारी थालेको हो ।
प्रदेश नं. ५ को उद्योग पर्यटन वन तथा वातावरण मन्त्रालयले यस्तो तयारी थालेको हो । नेपाल भ्रमण वर्ष सन् २०२० आयोजक समितिको प्रदेश संयोजक समेत रहनुभएका पर्यटनमन्त्री लिला गिरीले भ्रमण वर्ष उद्घाटन कार्यक्रम भब्य बनाउन आवश्यक तयारी थालिएको बताउनुभयो ।
पर्यटन मन्त्री गिरीले प्रदेश समिति सचिवालयको बैठक बोलाएर आवश्यक तयारी थाल्नुभएको हो । मंगलबार बेलुका मन्त्रालयमा सचिवालयको बैठक बोलाएर मन्त्री गिरीले तयारीका लागि बिभिन्न निर्णय लिनुभएको छ । भ्रमण वर्ष शुभारम्भ कार्यक्रममा वर्दियाको ठाकुरद्धारामा ११ बजे मुख्यमन्त्रीबाट उद्घाटन गराउने, उक्त कार्यक्रममा प्रदेशका अन्य मन्त्रीहरु, सांसदहरु, सचिवहरु, योजना आयोगका उपाध्यक्ष, १२ वटै जिल्लाका पर्यटन प्रबद्र्धन समितिका ५÷५ जना सदस्य, स्थानीय तहका प्रमुख उपप्रमुखलाई निमन्त्रणा पठाउने निर्णय मन्त्री गिरीले लिनुभएको छ ।
त्यस्तै उद्घाटन कार्यक्रमलाई ब्यवस्थित बनाउन बर्दिया जिल्लाका होटल ब्यवसायी, यातायात ब्यवसायी, पर्यटन समिति, संचार क्षेत्र तथा विभिन्न सामाजिक संघ संस्थाहरुसंग समन्वय गर्ने, कार्यक्रममा विभिन्न भाषा भाषी तथा संस्कृति झल्कने झाँकी, भजन मण्डली तथा नाच प्रस्तुत गर्ने निर्णय गरिएको प्रदेश समितिका सहसंयोजक माधव नेपालले जानकारी दिनुभयो ।
उद्घाटन समारोहमा स्थानीय तहमा भ्रमण वर्षमा गरिने कार्यक्रम घोषणा गर्न जिल्ला पर्यटन प्रवद्र्धन समितिमार्फत माग गर्ने निणर्य समेत गरिएको छ । उद्घाटनका दिन जनवरी १ तारिकका दिन विहान ७ बजे बाँकेमा जंगल सफारीको समेत उद्घाटन गरिने नेपालले जानकारी दिनुभयो ।
पर्यटनलाई जनताको आयआर्जनसंग जोड्न नेपाल सरकारले भ्रमण वर्ष घोषणा गरेको भन्दै पर्यटन मन्त्री गिरीले यसलाई सबैले सहयोग गर्न गनुपर्ने धारणा राख्नुभयो ।
उद्घाटन कार्यक्रमलाई थप भब्य बनाउन होटल व्यवसायी संघ प्रदेश नं. ५ ले २०२० जना भारतीय पर्यटकलाई समेत सहभागी गराएर विषेश छुटमा एक रात दुई दिन नेपाल बस्ने ब्यवस्था मिलाउने तयारी गरेको संघका अध्यक्ष भाष्कर काफ्लले जानकारी दिनुभयो । ती पर्यटकले जंगल सफारी समेत गर्नेछन् । अन्य विदेशी पर्यटक आए उनीहरुलाई पनि विषेश छुटसहितको खानेबस्ने व्यवस्था गरिने काफ्लेले बताउनुभयो । उद्घाटन कार्यक्रमका लागि १५ लाख रुपैयाँ खर्च हुने अनुमान गरिएको छ ।
सन् २०२० लाई नेपाल भम्रण वर्ष घोषणा गरेको सरकारले उक्त अवधिमा नेपालमा २० लाख पर्यटक नेपाल भित्र्याउने लक्ष्य लिएको छ । नेपालका सातैवटै प्रदेशले भ्रमण वर्ष अवधिमा बिभिन्न कार्यक्रम गर्नेछन् ।
Discussion about this post