धनगढी माघ ९ गते । सुदूरपश्चिम प्रदेश अन्तरगत सामाजिक विकास मन्त्रालयले अत्याधुनिक भनेर बाँडेको एम्बुलेन्स बिरामीलाई नेपालगञ्ज पुर्याएर फर्किदै गरेको अवस्थामा डोटीको बुडरमा दुर्घटनामा परेको छ।
चालक मुस्किलले जोगिएपनि एम्बुलेन्स भने नराम्ररी क्षतिग्रस्त भएको छ। एम्बुलेन्सको अगाडिको भाग पूर्णरुपमा क्षति भएको छ।
प्रहरीका अनुसार बझाङको छब्बिस पाथिभेरा गाँउपालिकाको मटेला स्वास्थ्य चौकीको सु प प्र ०१००१ झ ३४८ नम्बरको एम्बुलेन्स जोरायल गाँउपालिका वडा नम्बर २ बुडर बजार नजिकै मोडमा मंगलवार साँझ दुर्घटना भएको हो।
ईप्रका बुडरका प्रमुख प्रहरी नायव निरिक्षक कर्ण रौलेले बझाङबाट कोहलपुर बिरामी पुर्याएर फर्किदै गरेको एम्बुलेन्स दुर्घटनामा परेको बताए।
बुडरबाट मर्मत लागि ल्याएको एम्बुलेन्सको तस्वीर लिन धनगढी बोराडाडीस्थित सिप्रदी ट्रेडिङको सर्भिस सेन्टर पुगेका सञ्चारकर्मीहरुलाई त्यहाँका कर्मचारीले तस्वीर लिन दिएनन । उक्त एम्बुलेन्स आज दिउसो बुडरबाट धनगढी ल्याइएको हो।
चालकहरुले सामाजिक विकास मन्त्रालयले अत्याधुनिक भनेर बाडेको एम्बुलेन्स एक पांग्रे भएको, ब्रेक नलाग्ने, ओरालोमा अत्यन्त तातिने, पट्टावाला भएकोले उफ्रिने लगायतका समस्याहरु भएको बताएका थिए।
संयुक्त एम्बुलेन्स चालक संघका सुदूर पश्चिम प्रदेश अध्यक्ष लक्ष्मण सिंहले उक्त एम्बुलेन्स चलाउनु बिरामी र चालकका लागि अत्यन्त जोखिमपूर्ण भएकोले सुदूरपश्चिमका चालकहरुले नचलाउने बताएका थिए। यद्दपि सामाजिक विकास मन्त्रालयको दवावमा चालकहरु उक्त एम्बुलेन्स चलाउन बाध्य भएका छन्।
Discussion about this post