सुर्खेत माघ ९ गते । यही माघ ४ गतेबाट कर्णाली प्रदेशको राजधानी वीरेन्द्रनगर सुर्खेतको बुद्धपथमा निर्माण गरिने बुद्ध सरोवर निर्माण अभियानकालागि संचालित “धम्म देशना” कार्यक्रम आज समापन गरिएको छ ।
बौद्ध सरोवर निर्माणमा सहयोग रकम संकलनको लागि सुरु गरिएको ‘धम्म देशना’ समापन गरिएको हो । नेपालमै पहिलो पटक १ सय ८ फिट अग्लो बुद्धको मुर्ती सहितको सरोवर निर्माणमा सहयोगको धम्म देशना कार्यक्रम शुरु गरिएको थियो ।
धम्म देशनाको आज (बिहीबार) कर्णाली प्रदेश सरकारका सामाजिक विकास मन्त्री दल रावलले समापन गर्नुभएको हो । धम्म देशना कार्यक्रम समापन गर्दै मन्त्री रावलले बुद्धको सन्देशलाई संसारभर फैलाउन पर्नेमा जोड दिँदै उहाँले बुद्धले दिनुभएको मार्ग निर्देशनमा हिँड्नु पर्ने आवश्यकता औल्याउनुभयो ।
करिव ५० लाख सहयोग रकम संकलन गर्ने लक्ष्य सहित सुरु गरिएको धम्म देशनाबाट संकलित रकम केहि दिनमा सार्वजनिक गर्ने बुद्ध सरोवर व्यवस्थापन समितिका अध्यक्ष पञ्चसिंह रोकायले जानकारी दिनुभयो । कार्यक्रमलाई सफलतापूर्वक सम्पन्न गर्न लाग्नुभएका सम्पूर्ण सहयोगी दाताहरुलाई धन्यवाद दिँदै उहाँले आगामि दिनमा पनि सहयोगको अपेक्षा राखेको बताउनुभयो ।
धम्म देशना कार्यक्रममा धर्मगुरु प्रेमदोर्जे लामाले देशना दिनुभएको थियो । त्यस्तै समापन कार्यक्रममा भिक्षु मैत्री महास्थवीर पनि देशना दिनुभएको थियो भने कार्यक्रममा १३ जिल्लाका लामा र आनीहरुको सहभागिता रहेको अभियानका महासचिव जीवनकुमार शाक्यले जानकारी दिनुभयो ।
वीरेन्द्रनगर वडा नम्बर ६ स्थित बुद्धपथमा ८ कट्ठा जग्गा क्षेत्रफलमा निर्माण हुन लागेको बुद्ध सरोवर निर्माणको लागि ९ करोड देखि ११ करोड लाग्ने अनुमान गरिएको निर्माण समितिले जनाएको छ ।
Discussion about this post