बाँके फागुन २१ गते । डुडुवा गाउँपालिकाको छैठौं गाउँसभा आज बुधबारदेखि शुरु भएको छ । गाउँपालिका अध्यक्ष नरेन्द्र कुमार चौधरीको अध्यक्षतामा शुरु भएको सभामा चार वटा विधेयकसहित बजेट तथा कार्यक्रमको संशोधन प्रस्ताव पेश भएको छ । संशोधित बजेट तथा कार्यक्रमको आजै बसेको गाउँसभा बैठकले पारित गरेको छ । मति २०७६ फागुन १२ गते बसेको विधायन समितिको बैठक र २०७६ फागुन २० गते बसेको गाउँ कार्यपालिकाको बैठकको निर्णय अनुसार गाउँ सभामा प्रस्तुत डुडुवा गाउँपालिकाको कृषि व्यवसाय प्रवर्द्धन सम्बन्धि व्यवस्था गर्न बनेको विधेयक २०७६, स्वास्थ्य तथा सरसफाई सम्बन्धि व्यवस्था गर्न बनेको विधेयक २०७६, स्थानीय पूर्वाधार सम्बन्धि व्यवस्था गर्न बनेको विधेयक २०७६ र स्थानीय सडक निर्माण, सम्भार तथा विस्तार गर्ने सम्बन्धि व्यवस्था गर्न बनेको विधेयक २०७६ माथिको छलफल शुरु भएको छ । विधायन समितिका संयोजक लिलावती यादवले प्रस्तुत गर्नु भएको विधेयकमाथी सभाका सदस्य मोहनराम मिश्र आमोद तिवारी, भण्डारीलाल यादवले आ आफनो विचार व्यक्त गर्नुभएको थियो । गाउँपालिका अध्यक्ष चौधरीले प्रस्तुत गरेको संशोधित बजेट तथा कार्यक्रम र प्रगति प्रतिवेदनमा अहिले विश्वलाई नै त्रसित बनाउने गरि महामारीको रुपमा फैलिएको नोबल कोरोना नामक भाइरसको संक्रमणको उच्च जोखिममा नेपालमा रहेको हुँदा यसबाट आम नागरिकलाई सुरक्षित राख्न पुर्व तयारी अन्तर्गत सचेतनामुलक कार्यक्रम, स्वास्थ्यकर्मीहरुको परिचालन, निरोधात्मक सामग्रीहरुको खरिद तथा व्यवस्थापन आदिको बन्दोबस्त गर्ने भएको छ ।
Discussion about this post