बाँके फागुन २३ गते । गैर आवासीय नेपाली संघका प्रतिनिधीहरु र नेपाल पत्रकार महासंघका पदाधिकारीहरु बीच नेपालका बिभिन्न जिल्लामा रहेका बिमानस्थलहरुको सरसफाईका विषयमा पत्रकार महासंघ बाँकेको सभा हलमा बिशेष छलफल गरिएको छ । गैर आवासीय नेपाली संघ आइसीसीका सदस्य खेम शर्माको प्रमुख आतिथ्य र नेपाल पत्रकार महासंघ बाँकेका अध्यक्ष ठाकुरसिंह थारुको अध्यक्षतामा भएको भेटघाट कार्यक्रममा सुदूर प्रदेशको कैलालीको धनगढीस्थित विमानस्थल, नेपालगन्जको राँझा विमानस्थल र काठमार्डौंको विमानस्थलमा देखिएको सरसफाईको अवस्थाका विषयमा छलफल गरिएको हो ।
१३ वर्ष देखि अष्ट्रेलियामा बस्दै आउनुभएका एनआरएनए आइसीसीका सदस्य खेम शर्माले गैरआवासीय नेपाली संघले नेपालमा केही उदाहरणीय कार्यक्रमहरु गरेर देखाउने अभिप्राय राखेको र सोही अभिप्राय अनुसार नेपालका बिभिन्न विमानस्थलहरुमा सरसफाईको कार्यक्रम सन्चालन गर्ने निष्कर्षमा पुगेको स्पष्ट पार्दै बर्तमान समयमा विमानस्थलहरुमा सरसफाईको अवस्थाका बारेमा जानकारी लिनका लागि आफू आएको बताउनुभयो । गैर आवासीय नेपाली संघ आईसीसीका सदस्य शर्माले बिमानस्थलहरुमा सो सरसफाई सम्बन्धि कार्यक्रमको परियोजना गैर आवासीय नेपाली संघ र नागरिक उडड्यन कार्यालयको संयुक्त पहलमा संचालन गरिने जानकारी दिनुभयो ।
सदस्य शर्माले विकसित राष्ट्रहरुमा सरसफाइका लागि हरेक नागरिक सचेत रहेकोले त्यहाँ जताततै सरसफाईयुक्त वातावरण देख्न पाइन्छ भने नेपालमा पनि सरसफाईयुक्त वातावरण सृजना गर्न आम सरोकारवालाहरुलाई जिम्मेवार बनाउन सकेको खण्डमा सरसफाईयुक्त वातावरण सृजना भएको देख्न सकिने बताउनुभयो । त्यसैगरी उहाँले देश–विदेशबाट आउने पर्यटक एवं अतिथीहरु शुरुमै विमानस्थलमा पुग्ने भएकोले उनिहरुलाई सकारात्मक प्रभाव पार्न विमानस्थलमा सरसफाई प्रभावकारी हुनुपर्ने कुरामा जोड दिए ।
बाँकेका पत्रकार एवं सन्चारकर्मीहरुले बिमानस्थलहरुमा सरसफाईको अवस्था विश्लेषण गर्नेक्रममा नेपालगन्जस्थित राँझा विमानस्थलमा पहिलेको तुलनामा सरसफाइको अवस्था निकै सुधारात्मक रहेको बताएका छन् ।
त्यसैगरी विमानस्थलमा प्रभावकारीरुपमा सरसफाईयुक्त वातावरण सृजना गर्न विमानस्थलमा काम गर्ने सबै तहका कर्मचारीहरु देखि आम सरोकारवाला नागरिकहरुलाई सचेत एवं जागरुक बनाउनुका साथै विमानस्थलाई सरसफाई राख्नका लागि उनिहरुलाई जिम्मेवार बनाउनुपर्ने कुरामा छलफलका सहभागीहरुले जोड दिएका छन् ।
छलफलमा गैर आवासीय नेपाली संघका आइसीसी सदस्य खेम शर्माको टोली सदस्य बिष्णु धिताल र रमेश रावल, नेपाल पत्रकार महासंघ बाँकेका अध्यक्ष ठाकुरसिंह थारु, पत्रकार महासंघ ५ नंबर प्रदेशका महासचिव भेषराज बस्नेत, प्रेस संंगठन नेपाल बाँकेका संयोजक डक्ट प्रसाद धिताल, सहसंयोजक हेमन्त बिक, आदिवासी जनजाती पत्रकार संघका महासचिव गजेन्द्र गरुङ्ग, पत्रकार महासंघ बाँकेका सदस्य कृष्ण ओली, तिलक नेपाली, रविन्द्र सिंह ठकुरी लगायतको उपस्थिती रहेको थियो ।
Discussion about this post