बर्दिया चैत्र २६ गते । लकडाउनका कारण कालिकोटमा अलपत्र परेका बर्दियाका १९ जना मजदुरलाई उद्धार गरिएको छ । मंगलबार कालिकोट प्रशासन, खाँडाचक्र नगरपालिका र प्रहरीले मजदुरहरुको उद्धार गरेको हो ।उनीहरुलाई जुम्लाका ठेकेदार राजुसिंह कठायतले चैत ८ गते कर्णाली राजमार्गमा काम गर्नका लागि लगेका थिए । लकडाउन सुरु भएदेखि ठेकेदार सम्पर्कविहीन भएपछि आफुहरु अलपत्र परेको मजदुर बद्लु गोडियाले बताए ।मजदुर अलपत्र परेको समाचार विभिन्न संचारमाध्ययममा प्रसारण तथा प्रकाशन भएपछि कालिकोट प्रशासन र खाँडाचक्र नगरपालिकाका नगरप्रमुख जसीप्रसाद पाण्डेसहितको टोली मजदुर भएको स्थानमा पुगेका हुन् ।
नगरप्रमुखले मजदुरहरुलाई १० दिनका लागि पुग्ने खाद्यान्न प्रदान गरेको स्थानिय संचारकर्मी विश्वनाथ सिम्खडाले जानकारी दिए ।
आफुसँग भएको चामलकेही दिनमै सकिएपछि आफुहरु भोकभोकै रहेको मजदुर बदलु गोडियाले बताए। ‘ठेकदारले १८ गते सम्मको लागि रासन दिएका थिए । १७ गतेकै वेलुका चामल सकियो, ‘फेरि अलिकती ल्याएर दिए । ‘त्यो चामल चार दिनसम्म धान्यो ‘अहिले भोकै छौ, । फोन गर्दा ठेकेदारले फोननै नउठाउने गरेको उनले बताए ।मजदुरहरुले आफुहरुलाई आफ्नै जिल्ला पठाउन अनुरोध गरेपनि यस्तो अवस्थामा पठाउन नसकिने भएपछि नगरपालिकाले उनीहरुलाई खाद्यान्नको व्यवस्था मिलाएको संचारकर्मी विश्वनाथ सिम्खडाले जानकारी दिए । सम्पर्कविहीन भएको ठेकेदारको खोजी गरिरहेको प्रशासनले जनाएको छ ।
Discussion about this post