जावेद अन्सारी बाँके बैशाख ६ गते । नेपालमा कोरोना भाइरसको संक्रमण फैलिने क्रममा रहे पनि बाँकेमा भने त्यसको परीक्षणका लागि प्रयोगशाला नै स्थापना हुन सकेको छैन् । जसका कारण कोरोना संक्रमण भए/नभएको बारे थाहा हुन नसकेको हो । प्रदेश सरकारले भेरी अस्पतालमा प्रयोगशाला स्थापना गर्ने भनेपनि अझैसम्म सुचारु हुन सकेको छैन्। नेपालगन्ज मेडिकल कलेज शिक्षण अस्पतालले नेपालगन्ज र कोहलपुरमा ज्वरो क्लिनिक सन्चालन गरेका छन् । तर त्यहाँ ज्वरो मापन गर्ने बाहेक अन्य परीक्षण हुन सकेको छैन् । सरकारले ल्याव र किट उपलब्ध गराउन पनि नसक्ने र निजी मेडिकलहरुलाई ल्याव सन्चालन गर्न नदिएका कारण कोरोना संक्रमित पहिचानमा चिकित्सकहरुलाई ठूलो सकस परेको नेपालगन्ज मेडिकल कलेज शिक्षण अस्पतालका सहायक निर्देशक रोमन किदवाईले बताउनुभयो ।
शनिवार एकजनाको आइसोलेसनमा उपचारकै क्रममा बर्दिया गुलरियाका एकजना पुरुषको मृत्यु भयो । कोरोना आशंका गरिएका ति पुरुषको स्वाव समेत परीक्षण हुन सकेको थिएन् । उनको मृत्युपछि मात्र अव स्वाव परीक्षण हुने छ । नेपालगन्ज मेडिकल कलेजमा अहिलेपनि ९ जनाको आइसोलेनमा राखेर उपचार भइरहेको छ । तर ल्याव सन्चालन नहुँदा उनीहरुको परीक्षणमा विलम्व भइरहेको छ । संकास्पद विरामीको नमूना संकलन गरेर बुटवल पठाउने काम भइरहेको किदवाईले बताउनुभयो । बाँकेमा कोरोना भाइरस परीक्षण गर्ने प्रयोगशाला संचालन भने अहिलेसम्म हुन सकेको छैन् । नेपाल सरकारले चैतको पहिलो साता भेरी अस्पतालसँगै राजधानी बाहिरका तीन स्थानमा प्रयोगशाला स्थापना गर्ने निर्णय गरेको थियो। तर सरकारको निर्णय कार्यान्वयन हुन सकेको छैन। संघीय सरकारको निर्णय कार्यान्वयन नभएपछि प्रदेश सरकारको सहयोगमा बाँकेमा प्रयोगशाला स्थापना गर्ने काम सुरु भयो। तर त्यो पनि कछुवाको गतिमा काम भएपछि प्रयोगशाला संचालन हुन नसकेको हो। चैत्रको १९ गते भेरी अस्पताल नेपालगन्जले रियल टाइम पिसिआर मेसिन सहित प्रयोगशाला संचालनका लागि अन्य अत्यावश्यक सामाग्री तीन दिन भित्र उपलब्ध गराउने सर्त राख्दै सूचना प्रकाशित गरेको थियो। तर हालसम्म प्रयोगशाला संचालनमा आउन नसकेपछि नागरिकस्तरबाट अस्पताल प्रशासनको आलोचना सुरु भएको छ। भारतीय सीमासँग जोडिएको बाँकेमा कोरोना परीक्षण गर्ने प्रयोगशाला स्थापनामा सरकारले उदासिनता देखाएको भन्दै स्थानीयहरुले गुनासो गरेका छन।
Discussion about this post