बाँके बैशाख ८ गते । राजनीतिक संयन्त्रबाट राहत वितरण गर्ने निर्णय सहित नेपालगन्जमा उपमहानगरपालिका वडा नम्वर ४ मा देखिएको विवाद तत्कालका लागि टुंगीएको छ । राहत वितरण व्यवस्थित र प्रभावकारी नभएको भन्दै घरभाडामा लिएकाहरुले नेपालगन्ज उपमहानगरपालिका कार्यालयमै पुगेर आज प्रदर्शनसँगै तालाबन्दी गरेपछि राजनीतिक संयन्त्रण निर्माण गरिएको नेपालगन्ज उपमहानगरपालिकाका उपमेयर उमा थापामगरले जानकारी दिनुभयो।
सबै दलका सदस्य रहने गरी निर्माण गरिएको उक्त संयन्त्रले भोलीदेखि काम सुरु गर्नेछ । वडाअध्यक्ष सफिक वेहनाले पहुँचका आधारमा राहत वितरण गरेको आरोप लगाउँदै हिंजो राहत नपाएकाहरुले वडा कार्यालयमा प्रदर्शन गरेका थिए । आज पनि उनीहरुले नेपालगन्ज उपमहानगरपालिकामै पुगेर लकडाउनको उल्लंघन गर्दै प्रदर्शन गरेका थिए । राहत वितरणका नाममा विभिन्न खाले उल्झन देखाउने काम गरेको पीडितहरुले आरोप लगाएका छन् । भोकभोकै बस्नु पर्ने अवस्था आएपछि आफुहरुले बाध्य भएर लकडाउन तोड्नु परेको पीडितहरुको भनाइ थियो । सयबढीको संख्यामा पुगेका उनीहरुले नेपालगन्ज उपमहानगरपालिका कार्यालयमा नारावाजीसहित प्रदर्शन गर्नुका साथै तालाबन्दी गरेका थिए । राजनीतिक संयन्त्र निर्माण गरेर राहत वितरण गर्ने निर्णय भएपछि उनीहरु आन्दोलनबाट पछि हटेका हुन् ।
Discussion about this post