संजिव छतकुलि बिरगंज बैशाख १७ गते ।नेपाली कांग्रेसका केन्द्रीय सदस्य एवम पुर्ब मन्त्री अजयकुमार चौरसियाले कोरोना भाइरसको संक्रमणबाट बच्नका लागि सरकारले जसरी काम गर्नुपर्ने थियो त्यो गर्न नसकेको भन्दै आक्रोश जनाएका छन् ।
वीरगञ्जमा बुधबार स्थानीय पत्रकारहरूसँग कुरा गर्दै कांग्रेस नेता चौरसियाले कोरोना भाइरसको संक्रमणसँग जुध्नका लागि राष्ट्रपति, प्रधानमन्त्री, मन्त्री र भीभीआईपीहरूको तलब, भत्ता र सुविधामा ३० प्रतिशत कटौती गर्न माग गरेका थिए ।
उनले सो रकमलाई कोरोना कोषमा जम्मा गरेर जनताको उपचारमा र राहतमा खर्च गर्नुपर्ने बताएका छन् । ‘कोरोना भाइरसको संक्रमणसँग जुध्नका लागि प्रधानमन्त्री, मन्त्री र उच्च तहमा बसेकाहरूको तलब, भत्ता र सुविधाहरूमा ३० प्रतिशत कटौती गर्नुपर्छ’, उनले भने, ‘सरकारलाई कांग्रेसले आर्थिक सहयोग गरेको छ । कोरोनासँग लड्न सरकारलाई सबै सहयोग गरेको छ ।’
कांग्रेस नेता चौरसियाले नारायणी उपक्षेत्रीय अस्पताललाई कोरोना अस्पताल बनाएको भन्दै आपत्ति जनाए । ‘नारायणी अस्पतालमा सबै सेवा सुरुचा गर्नुपर्छ । कोरोना अस्पताल बनाउनु हुँदैन’, उनले भने, ‘वीरगञ्जलाई सरकारले कोरोना भाइरसको राजधानी बनाउन खोजेको भन्दै आफ्नो पार्टीको आपत्ति रहेको बताए।
नारायणी अस्पताललाई कोरोना भाइरसको संक्रमितको उपचार नगर्न आग्रह गर्दै कांग्रेस नेता चौरसियाले भने, ‘हामी स्थानीयहरूको मागको सुनुवाई हुनुपर्छ । होइन भने सडकमा निस्कनुपर्ने अवस्था आउन सक्छ भने ’प्रदेश २ को सरकारले कोरोना भाइरस चेकजाँच गर्न किट नारायणी अस्पताललाई हस्तान्तरण गरेपनि अहिले सम्म सुचारू नभएको बताए।
लकडाउनबाट समस्यामा परेका अति विपन्न र मजदुरहरूलाई खाद्य समस्या भएको भन्दै नेपाली कांग्रेसका नेता चौरसियाले कुनै पनि भेदभाव नगरेर राहत वितरण गर्न माग गरेका छन् । उनले राहत वितरणमा भेदभाव गरिए कांग्रेस चुप लागेर नबस्ने चेतावनी पनि दिएका छन् ।
स्थानीय प्रशासनले राजनीतिक पूर्वाग्रही भएर कांग्रेसका नेता र कार्यकर्ताहरूलाई दुःख दिने गरेको उनको आरोप छ । स्थानीय प्रशासनले कांग्रेसका नेताहरूलाई पास नदिने गरेको पनि गुनासो गरेका छन् ।
कांग्रेसका नेता चौरसियाले राज्यका हरेक निकायमा संविधानले दिएको अधिकारअनुसार मधेसीहरूको उपस्थिति हुनुपर्ने बताएका छन् । उनले नेपाल प्रहरीमा हालै भएका बढुवाहरूमा मधेसी मूलका प्रहरी अधिकारीहरूको बढुवामा बिभेद भएको भन्दै असन्तुष्टि जनाएका छन् ।र आगामी दिनको विभेद नगर्न समेत आग्रह गरेका छन् ।
Discussion about this post