बाँके बैशाख २३ गते ।
कोरोनाको संक्रमण फैलिन नदिन र संक्रमितको कन्टयाक्ट टे«सिङ प्रभावकारी गराउन नेपालगन्जलाई निषेधित क्षेत्र घोषणा गरेको जिल्ला प्रशासन कार्यालय बाँकेले ‘व्याकफोर्स’का रुपमा नेपाली सेनालाई परिचालन गरेको छ ।
लकडाउन देखि नै नेपालगन्जमा नेपाली सेना परिचालन गरिएको भएपनि कोरोनाको संक्रमण फैलिएपछि सुरक्षा समितिको बैठकले ‘व्याकफोर्स’का रुपमा सेनालाई परिचालन गर्ने निर्णय गरेको थियो ।
मंगलवारदेखि नेपाली सेनाले नेपालगन्जमा गस्ति सुरु गरेको छ । ‘लकडाउनबाटै नेपाली सेना परिचालन गरेका थियौं बाँकेका सहायक प्रमुख जिल्ला अधिकारी दीर्घराज उपाध्यायले भने–‘तर कोरोनाको संक्रमण फैलिएपछि थप सजगता अपनाउनु पर्ने भएकाले सेनालाई सक्रिय गराउने निर्णय भएको हो, त्यसैअनुसार गस्ति गरिरहेको छ ।’
लकडाउनको समयमा नेपाल प्रहरीसँगै नेपाली सेना र सशस्त्र प्रहरी मिलेर चोकचोकमा चेकजाँच गर्ने र मानिसहरुको मुभमेन्ट कम गर्ने काम गर्दै आएको उनले बताए । जिल्लाको सुरक्षा समितिमा सेनाको समेत प्रतिनिधित्व हुने भएकाले समन्वय र सहकार्यबाटै सेना परिचालन भएको उनले स्पष्ट पारेका छन् ।
नेपालगन्जमा कोरोना संक्रमण फैलिन थालेपछि स्थानीय प्रशासनले आगामी २५ गतेसम्मका लागि निषेधित क्षेत्र घोषणा गरेको छ । जस्का कारण आइतवार नेपालगन्ज सुनसान रह्यो । सुरक्षाकर्मी, स्वास्थ्यकर्मी, एम्वुलेन्ससहित अत्यावश्यक सवारीसाधन बाहेक अन्य सवारीसाधन ठप्प भए । कोरोनाको त्रासका कारण आइतवार त्यसैपनि नागरिकहरु घरबाट बाहिर निस्कन सकेका छैनन् ।
Discussion about this post