काठमाडौं बैशाख २५ गते।
देशव्यापी शुरु गरिएको कोरोना परीक्षण सांसदहरुमा पनि गरिने भएको छ । आज बिहीबारदेखि प्रतिनिधिसभा र राष्ट्रियसभाका सांसदहरुको कोरोना परीक्षण गरिने संसद सचिवालयले जनाएको छ ।
बिहीबार बिहान ११ बजेदेखि प्रतिनिधिसभाका सदस्यहरुको पीसीआर प्रविधिबाट र १० बजेदेखि राष्ट्रिय सभाका सदस्यहरुको परीक्षण गरिने सचिवालयको भनाई छ । यसका लागि संघीय संसद भवनको हलमा व्यवस्था मिलाइएको छ । एकैदिनमा सबै सांसदको स्वाब संकलन गर्ने पनि सचिवालयको योजना छ ।
सांसदहरुसँगै संसद सचिवावलयका कर्मचारी, मर्यादापालक, पत्रकार र क्यामेरामेनको पनि स्वाब संकलन र परीक्षण गरिनेछ । मंगलबार बसेको कार्यव्यवस्था समितिले स्वास्थ्य मन्त्रालयलाई संसद भवन छिर्नेहरुको स्वास्थ्य परीक्षणको व्यवस्थाका लागि आग्रह गरेको थियो ।
स्वास्थ्य मन्त्रालयले थप चिकित्सकको व्यवस्था गरेर संघीय संसदका सबैको कोरोना परीक्षण गर्ने भएको हो । संसदको बजेट अधिवेशन शुक्रबारदेखि शुरु हुदैछ । यसपटक संसदमा महासचिव भरतराज गौतमले संसदको कार्यसुची तय गर्नेछन । गौतमलाई केहीदिन अघि मात्रै राष्ट्रपति विद्यादेवी भण्डारीले महासचिवमा नियुक्त गरेकी हुन ।
Discussion about this post