बाँके जेठ १५ गते ।
बाँकेमा प्रमुख जिल्ला अधिकारी रामबहादुर कुरुम्वाङ आएलगत्तै लकडाउन थप कडाइ भएको छ । कोरोना रोकथाम तथा नियन्त्रणका लागि बाँकेमा बुधवारदेखि अनिश्चितकालिन निषेधाज्ञा जारी गरिएको छ ।
प्रमुख जिल्ला अधिकारी कुरुम्वाङ आएलगत्तै निषेधाज्ञा जारी गरिएको हो । अत्यावश्यक सेवा वाहेक अन्य सबै सेवा बन्द गरिएको छ । विहीबार नेपालगन्जका विभिन्न स्थानमा प्रहरीको चेकजाँच कडाइ गरेको दृष्य देख्न सकिन्थ्यो ।
चोक चोकमा प्रहरीको वाक्लो तैनाथी छ । नेपालगन्जका मुख्य चोक धम्वोजी, वीपीचोक, पुष्पलाल चोक, चारवाहिनी, त्रिभुवन चोक, सेतुविक चोकलगायतका स्थानमा नेपाल प्रहरीसँगै सशस्त्र प्रहरीलाई पनि परिचालन गरिएको छ ।
नगरका भित्रिसडकहरुमा पनि प्रहरी परिचालन गरिएको छ। कामविहीन हिडडुल गर्नेलाई प्रहरीले सम्झाउने बुझाउने गरेको देखिन्थ्यो ।
बुधवारको तुलनामा विहीबार नेपालगन्जमा मानिसहरुको चहलपलह निकै काम मात्रामा देखिएको थियो । बाँकेमा कोरोना संक्रमितको संख्या १७१ पुग्दा नेपालगन्जबाटै कोरोना संक्रमण सुरु भएको थियो ।
बाँकेका प्रमुख जिल्ला अधिकारी कुरुम्वाङले लकडाउनलाई थप प्रभावकारी गराउन स्थानीय प्रहरी प्रशासन प्रयत्नशील रहेको बताउनुभयो ।
प्रमुख जिल्ला अधिकारी कुरुम्वाङका अनुसार, बाँके कोरोनाको इपिसेन्टर भएकाले लकडाउनका सबैले कडाईका साथ पालना गर्नुको विकल्प नभएको बताउनुभयो ।
Discussion about this post