फाइल फोटो
काठमाडौं असार ३ गते ।
सीमामा दुई देशका सैनिकबीच हिंसात्मक झडप भएको दुई दिनपछि चीन र भारतका विदेश मन्त्रीले टेलिफोनमा कुराकानी गरेका छन्। चिनियाँ विदेशमन्त्री वाङ यी र भारतीय समकक्षी एस जयशंकरबीच बुधबार दिउँसो टेलिफोनमा कुराकानी भएको हो।
कुराकानी क्रमा दुई विदेश मन्त्रीले सीमामा भइरहेको तनावबारे छलफल गरेका थिए।
‘विदेश मन्त्री यीले समकक्षी जयशंकरलाई सोमबारको घटनामा अनुसन्धान गर्न, त्यसका जिम्मेवारहरूलाई कारबाही गर्न र उक्त क्षेत्रमा चिनियाँ सैनिकलाई उत्तेजित पार्ने गतिविधि रोक्न भने,’ ग्लोबल टाइम्सले लेखेको छ।
दुबै विदेश मन्त्रीले गल्वान उपत्यकामा उत्पन्न गम्भीर अवस्थालाई न्यायोचिन रूपमा व्यवस्थापन गर्ने बताएका छन्। यसअघि भारतीय प्रधानमन्त्री नरेन्द्र मोदीले भारतीय सैनिकको बलिदान खेर नजाने बताएका थिए। बुधबार कोरोनाभाइरसको नियन्त्रणका सम्बन्धमा मुख्यमन्त्रीहरूसँगको भर्चुअल मिटिङको सुरूमा मोदीले गल्वानमा मृत्यु भएका २० जना सैनिक सम्मानमा दुई मिनेट मौनधारण गरे। मौनधारणपछि सम्बोधन गर्दै उनले भारतीय सैनिकले गरेको बलिदानी खेर जान नदिने बताए।
‘वीरता हाम्रो देशको चरित्रको हिस्सा हो। भारत आफ्नो देशको सम्प्रभुताको रक्षा गर्न सक्षम छ, यसमा कुनै पनि देशलाई भ्रम नहोस्,’ मोदीले भने,‘हामी शान्ति चाहन्छौं तर कसैले हामीलाई उक्साउँछ भने त्यसको जवाफ दिन पनि सक्षम छौं।’ उनले चीनसँगको मतभेदलाई विवादमा बदलिन नदिन सधैँ प्रयास गरेको बताए।
‘समय आएपछि देशको सम्प्रभुताको रक्षा गर्न हामीले आफ्नो क्षमता प्रस्तुत गर्यौं,’ उनले भने,‘भारतको सम्प्रभुता हाम्रा लागि सर्वोच्च छ। त्यसको रक्षा गर्न हामीलाई कसैले रोक्न सक्दैन। म देशवासीलाई भरोसा दिलाउन चाहन्छु- हाम्रा जवानको बलिदान व्यर्थ जाँदैन।
उनले सोमबार राति लद्दाखको गल्वानमा भएको झडपमा परी मरेका सैनिकप्रति गर्व महशुस गरेको बताए।
Discussion about this post