फाइल फोटो
काठमाडौ असार ११ गते ।
सत्तारूढ नेपाल कम्युनिस्ट पार्टी (नेकपा) स्थायी कमिटी बैठकमा पार्टी अध्यक्ष पुष्पकमल दाहाल प्रचण्डले सरकार र पार्टी कामको निर्मम समीक्षा गर्नुपर्ने बताएका छन् । पार्टीको आज बाट सुरु भएको स्थायी कमिटीमा केपी ओलीपछि मन्तव्य राख्दै अध्यक्ष प्रचण्डले पत्रपत्रिकामा सरकारको भ्रष्टाचार, अनियमितता, घूसखोरी मात्रै समाचार बनेको भन्दै कमीकमजोरी नसच्याए पार्टी र कम्युनिस्ट आन्दोलन समाप्तीको दिशामा जाने बताएका हुन् ।
“यस्तै तरिकाले अघि बढ्ने हो भने हामी समाप्त हुन्छौं,” प्रचण्डले भनेको स्रोतले उद्धृत गर्दै भन्यो, “सरकार र पार्टीको कामको समीक्षा गर्छौं ।
भ्रष्टाचार, अनियमितता भएका छन् भने छानबिन गरौं । दोषी देखिए ती सबैलाई कार्वाहीको दायरामा ल्याउँ ।” उनले कोभिड रोकथाम र नियन्त्रणमा अहिले सम्म सरकारले गरेका प्रयास फलदायी नरहेको निष्कर्ष निकाल्दै यसको पनि समीक्षा हुनुपर्ने औंल्याएका छन् ।
सरकार अलोकप्रिय हुँदै गएको रक्षात्मक बन्नुपरेको अवस्थाको पनि गहिराइमा पुगेर समीक्षा गरेर निष्कर्षमा पुग्नुपर्ने उनको मत थियो।
उनले भने हामी एक–अर्का विरूद्ध हस्ताक्षर गर्ने तहसम्म पनि पुग्यौं । फर्किएर बैठकसम्म आइपुगेका छौं । कहाँ कमी–कमजोरी भए आत्मसमीक्षा गरेर तिनलाई सच्याउँ । हामीबीचको एकताको विकल्प छैन । हामी अहिले मिलेरै आएका छौं । मिलेर बैठक राखेका छौं । यही स्प्रिट कायम राखेर सरकार र पार्टीको समीक्षा गर्नुपर्छ ।” ‘ओलीले प्रस्तुत गरेका एजेन्डा अस्वीकृत भयो’ नेकपाका एकजना सचिवालय तहका नेताले पार्टी अध्यक्ष ओलीले बैठकमा प्रस्तुत गरेका एजेन्डा खारेज गरेर नयाँ एजेन्डा तय गरेको बताएका छन् ।
“बैठकको सुरुमा बोल्दै उहाँले कोभिड–१९ को रोकथाम नियन्त्रण, सीमा समस्यालगायत एजेन्डा प्रस्तुत गर्नुभएको थियो । एमसीसी प्रकरण पनि छलफल नगराउने मनशाय थियो । हामीले ती एजेन्डा मानेनौं र परिमार्जन सहित एजेन्डा प्रस्तुत ग¥यौं,” उनको भनाइ छ ।
झन्डै १२ मिनेट बोलेका प्रधानमन्त्री ओलीको म’न्तव्य निकै रक्षात्मक रहेको र सहयोगको याचना गरेजस्तो सुनिएको एक स्थायी कमिटी सदस्यले भने । त्यसपछि बोलेका प्रचण्ड आक्रामक शैलीमा प्रस्तुत भएका थिए ।
उनले अहिले सम्म सरकार सञ्चालनमा उठेका प्रश्नको उत्तर नखोज्ने हो भने पार्टी समाप्त हुने दोहोर्याएका थिए । प्रचण्डले आलोपालो प्रधानमन्त्री हुने सहमति छाडेर गल्ती गरेँ भन्ने महसुस भएको टिप्पणी गरेका थिए । उनले प्रधानमन्त्री ओलीमा अहंकार बढेको निष्कर्ष समेत निकालेका छन् ।
बुधबारदेखि सुरु भएको पार्टी स्थायी कमिटी बैठकमा अध्यक्ष प्रचण्डले प्रधानमन्त्री ओलीमाथि कडा आक्रोश पोखे । बैठकमा प्रचण्डको कडा प्रस्तुति सुनिसकेपछि प्रधानमन्त्री ओलीले आफू निराश बनेको अनौपचारिक प्रतिक्रिया दिएका थिए । बैठक शुक्रबार १२ बजेलाई तय भएको पार्टीका वरिष्ठ नेता झलनाथ खनालले जानकारी दिए ।
उनका अनुसार शुक्रबार देखि सदस्यहरूले बोल्ने क्रम सुरु हुन्छ । यसपल्ट राजनीतिक साङ्गठनिक दस्तावेज केही पनि प्रस्तुत गरिएको छैन ।
Discussion about this post