बाँके असार १२ गते ।
तीन जना कोरोना संक्रमित विरामीको सफल शल्यक्रिया गरेको नेपालगन्ज मेडिकल कलेज कोहलपुरले ति विरामीहरुको अवस्था सामान्य रहेको जनाएको छ । नेपाल सरकारबाट कोरोना संक्रमित विरामीको शल्यक्रिया सहित उपचार हुने सुविधा सम्पन्न अस्पताल अर्थात लेभल तीन घोषणा भएको मेडिकल कलेजले कोरोना संक्रमितको उपचार प्रभावकारी ढंगबाट गर्न सफल भएकोमा उत्साहीत भएको जनाएको छ ।
शुक्रबार पत्रकार सम्मेलनको आयोजना गरि मेडिकल कलेजले दुईजना संक्रमित गर्भवतिको शल्यक्रिया र उपचार, त्यस्तै अर्का एक जेष्ठ नागरिकको उपचारपछि अवस्था सामान्य रहेको जनाएको हो। तीनैजना अहिले कोभिड वार्डबाट डिस्चार्ज भएर नर्मल वार्डमा सिफ्ट भएको मेडिकल कलेजका सह निर्देशक डाक्टर नितेश कनोडियाले जानकारी दिनुभयो ।
मेडिकल कलेज कोहलपुरमा जेठ २६ गते भर्ना भएकी अछाम चौरपाटी गाउँपालिका ५ की कोरोना संक्रमित २५ बर्षिया गर्भवतिको जेठ २७ गते ठूलो आन्द्राको शल्यक्रिया भएको थियो । त्यस्तै भिम अस्पताल सिद्धार्थ नगर रुपन्देहीबाट रिफर भएर मेडिकल कलेज ल्याइएकी कपिलबस्तु कृष्णनगरकी कोरोना संक्रमित २७ बर्षिया गर्भवतिको असार ६ गते शल्यक्रिया गरिएको थियो । ति गर्भवतिले शल्यक्रिया पछि बच्चा जन्माएकी थिइन् ।
त्यसैगरी जेठ २२ गते अस्पताल भर्ना भएका रुकुम सानो भेरी नगरपालिका निवासी ८२ बर्षिय जेष्ठ नागरिकमा समेत कोरोना भाइरस पुष्टि भएपछि उनको समेत अस्पतालमा सफल उपचार भएको छ । दोस्रो पटक गरिएको पिसिआर परीक्षणमा तीनै जनाको रिपोर्टमा कोरोना भाइरस नेगेटिभ आएपछि असार १० गते उनीहरुलाई कोडिभ वार्डबाट आइसोलेसन वार्डमा सारिएको अस्पतालले जनाएको छ ।
मेडिकल कलेजका प्रबन्ध निर्देशक डा.सुरेस कनोडियाले अन्य विरामी जस्तै भाइरस संक्रमितको शल्यक्रिया र उपचार प्रक्रिया एउटै हुने भएपनि उपचारमा संलग्न हुँदा सावधानी र सतर्कता भने अप्नाउनु परेको बताउँनुहुन्छ ।
नेपालगन्ज मेडिकल कलेज नेपालगन्ज र कोहलपुर दुईवटै अस्पतालले कोभिड–१९ का शंका भएका ४ सय १५ जना विरामीहरुको निःशुल्क उपचार गर्दै आएको छ ।
उनीहरु सबैको पिसिआर रिपोर्ट नेगेटिभ आएको अस्पतालले जनाएको छ। संवेदनशील अवस्थामा पनि शिक्षण अस्पतालले सबै किसिमका विरामीहरुलाई गुणस्तरीय उपचार सेवा दिंदै आएको अस्पतालले जनाएको छ।
विश्व स्वास्थ्य संगठनले कोरोना संक्रमण फैलन नदिनका लागि निर्धारण गरेका सबै मापदण्डहरुको पालना गरेर अस्पतालले उपचार सेवा प्रवाह गर्र्दै आएकाले ढुक्क भएर उपचार सेवा लिन सबैलाई आग्रह गरेको छ ।
नेपालगन्ज मेडिकल कलेज शिक्षण अस्पतालले असार १४ गते बाट विहान ९ बजेदेखि बेलुका ५ बजेसम्म पहिले जस्तै सबै सेवा नियमति हुने पनि स्पष्ट पारेको छ ।
Discussion about this post