सिराज खान बाँके भदौ २४ गते । दस दिनसम्म विविध कार्यक्रम गरेर मनाइने मोहर्रम पर्वको आज अन्तिम दिन, ताजिया विसर्जन गरेर पर्वको समापन गरिँदैछ । मुस्लिम समुदायको बाक्लो बसोबास रहेको बाँकेमा पाँच करोड बढीका करिब एक हजार सय ताजिया राखिएको अनुमान गरिएको छ । मुस्लिम समुदायले घरघरमा स्थापना गरेका ताजिया सामूहिकरुपमा आज फुलटेक्रामा रहेका कर्बलामा विर्सजन गरिने छ ।
आज दिउसो नगरका विभिन्न भागबाट शुरु हुने ताजिया विसर्जन जुलुसले नगर परिक्रमा गरेर स्थानीय कर्बलामा पुगेर ताजिया विसर्जन गरेर मोहर्रम सम्पन्न गरिने मोहरर्रम तथा कर्बला संरक्षण समितिका अध्यक्ष मोहम्मद याकुब अन्सारीले बताउनु भयो । उहाँले यस बर्ष निकै धुमधामका साथ मोहर्रम मनाईएको जनाउनु भयो ।
बाँकेमा भने मुस्लिम समुदायको यस पर्वमा हिन्दुहरुको पनि पनि ठुलो सहभागीता हुने गरेको छ । हिन्दु समुदायमा पनि ताजिया राख्ने चलन रहेको शान्ति सद्भाव समिति बाँकेका सल्लाहकार कृष्णप्रसाद श्रेष्ठले बताउनु भयो। उहाँले एउटा समुदायको पर्वमा अर्को समुदायको बलियो आस्था रहनु नै सदभावको नमूना हो भन्नुभयो ।
नेपालगन्ज उद्योग वाणिज्य महासंघका केन्द्रीय सदस्यसमेत रहनु भएका श्रेष्ठले नेपालगन्ज सद्भावको शहर भएकै कारण यहाँ सबै समुदायको चाडपर्वमा सबैको उत्तिकै आस्था रहेको बताउनु भयो । ‘नेपालगञ्ज हिन्दू, मुस्लिम, शिख, इसाई लगायतका समुदाय एक अर्काका धर्म, संस्कृति र परम्परासँग जोडिंदै आएकोले यो शहर सबैको आस्था र सबै धर्मसँग जोडिएको शहर बनेको दावी गगर्नुभयो ।
आज मोहर्रमको विशेष दिन भएकाले व्रत बस्ने, गरिब गुरुवालाई खाना खुवाउने, नमाज पढ्ने र राम्रो कपडा लगाउने प्रचलन छ । आज हिन्दु र मुस्लिम समुदायका व्यक्तिहरुले शुभकामनासमेत आदाप्रदान गरिरहेका छन् ।
शान्ति सद्भाव समिति बाँकेका अध्यक्ष नन्दलाल वैश्यले नेपालगञ्ज नेपालकै मिश्रित समुदायको बसोबास रहेको शहर भएकै कारण यहाँ सबै धर्मप्रति सबैको आस्था र सम्मान कायम रहेको बताउनु भयो । ‘एउटा धर्मको व्यक्तिले अर्को धर्मप्रति आस्था राख्नु एकअर्काप्रतिको उच्च सम्मान र आदर हो । यो नेपालगन्जमा सदियौंदेखि चलिरहेको छ,’ नेपालगञ्ज उद्योग वाणिज्य संघका अध्यक्षसमेत रहेका वैश्यले भन्नुभयो ।
मुस्लिम समुदायका अगुवा शब्बीर अहमद अन्सारीले विहानैदेखि ताजिया विसर्जनको तयारी भइरहेको बताउनु भएको छ । उहाँले नेपालगञ्जमा रहेको धार्मिक एकता र सन्देशलाई यो पर्वले झनै प्रगाढ बनाएको बताउनु भयो । यहाँ सबै धर्म र समुदायका चाडपर्वमा सबैको बलियो आस्था रहंदै आएको उहाँको भनाई छ ।
इस्लामिक नयाँ वर्ष ‘हिजरी सम्वत् १४४१ को १० औं तारिखका दिन मोहर्रम मनाउने गरिन्छ । मोहर्रम हिजरी सम्वतको पहिलो महिना हो । हिजरी सम्वतको ५ तारिखदेखि सुरु हुने मोहर्रमको १० औं दिन आज विशेष महत्वको हुने गर्दछ । इराकको कर्वला शहरमा पैगम्बर मोहम्मदका नाति ईमाम हुसैनसहित परिवारका अन्य सदस्य र अन्य शहीद भएको सम्झनामा मोहरम मनाउने प्रचलन रहेको धार्मिक अगुवा मौलाना अब्दुल जब्बार मन्जरीले बताउनु भयो ।
सोमवार राती मुस्लिम, हिन्दू तथा अन्य जातिले आ–आफ्नो घर अगाडि ताजिया राखेर रातभरि जागरण बसेर विताएका थिए । सोही अवसरमा नगरभरी जताततै सजावट गरिएको थियो । साथै मिठा मिठा पकवान समेत वितरणा गरिएको थियो ।
Discussion about this post