बाँके मंसिर १८ गते ।
नेपाली कांग्रेसको १४ औँ महाधिवेशन अन्तर्गत प्रदेश समितिको लागि मतदान भइरहेको छ । प्रदेश–२ बाहेकका ६ प्रदेशमा हिजो उम्मेदवारहरूले मनोनयन दर्ता गराएसँगै आज मतदान भएको हो ।
प्रदेश नेतृत्वको लागि विभिन्न समूहले आफ्नो अनुकूल हुने गरी सहकार्य गरेका छन् । संस्थापन पक्ष र संस्थापन इतर पक्षले प्यानलसहित उम्मेदवारी दर्ता गराएको छ । लुम्बिनी प्रदेश सभापतिका लागि सांसद भरत शाह र रोल्पा जिल्ला पूर्वसभापति अमरसिंह पुनबीच प्रतिस्पर्धा हुने भएको छ ।
शाह संस्थापन समूहका र पुन संस्थापन इतर समूहबाट प्रदेश सभापतिका उम्मेदवार बन्नुभएको हो ।
यस्तै कर्णाली प्रदेशको सभापतिका लागि पार्टी सभापति शेरबहादुर देउवा, वरिष्ठ नेता रामचन्द्र पौडेल र नेता विमलेन्द्र निधि पक्षबाट एक÷एक जना गरी तीन जनाले प्रदेश सभापतिमा चुनाव लड्नुभएको छ ।
देउवा पक्षबाट ललितजङ्ग शाही, पौडेल पक्षबाट भूपेन्द्रजङ्ग शाही र निधि पक्षबाट मोतीराज बम प्रदेश सभापतिमा उम्मेदवार बन्नुभएको छ । सुदूरपश्चिम प्रदेशमा सभापतिको लागि संस्थापन समूहबाट केन्द्रीय सदस्य वीरबहादुर बलायर र संस्थापन इतर पक्षबाट नारायण मिश्र प्रतिस्पर्धामा रहनुभएको छ ।
कांग्रेसको प्रदेश अधिवेशनबाट सभापति, दुई उपसभापति, दुई महामन्त्री र एक महिलासहित तीन जना सहमहामन्त्रीको चयन हुनेछन् ।
Discussion about this post