बाँके, भदौ १५ गते ।
विपत्तिमा परेका नागरिकको पीडामा साथ दिन लाइफ लाइन जनरल हस्पिटलले भोटेकोशी बाढीपीडितका लागि एक लाख रुपैयाँ सहयोग गरेको छ।
भोटेकोशी नदीमा आएको बाढीबाट प्रभावित रसुवा र नुवाकोटका परिवारको राहत तथा उद्धारका लागि हस्पिटलले प्रधानमन्त्री दैवी प्रकोप उद्धार कोषमा उक्त रकम जम्मा गरेको हो।
लाइफ लाइन जनरल हस्पिटलका सञ्चालक डा. प्रतीक श्रेष्ठले बाँकेका प्रमुख जिल्ला अधिकारी दिलकुमार तामाङमार्फत एक लाख रुपैयाँको सहयोग रकम हस्तान्तरण गरेका हुन्।
हस्पिटलका तर्फबाट ७५ हजार रुपैयाँ तथा अस्ट्रेलियाको पर्थमा बस्दै आएका नीलु रेग्मी, मुक्ता रेग्मी र अनिशा रेग्मीका तर्फबाट २५ हजार रुपैयाँ गरी उक्त रकम जुटाइएको डा. श्रेष्ठले बताए।
विपत्तिमा परेका नागरिकलाई आर्थिक सहयोगभन्दा पनि त्यसमा जोडिएको मानवीय भावना महत्वपूर्ण हुने श्रेष्ठको भनाइ छ।
‘आज उनीहरूलाई विपत्ति परेको छ, भोलि यही अवस्था जोकोहीमाथि आउन सक्छ। यस्तो बेला पीडितको दुःख हेरेर मात्र बस्नु हुँदैन, आफूले सकेको ठाउँबाट हातेमालो गर्नुपर्छ भन्ने मेरो मान्यता हो,’ उनले भने, ‘हामीले दिएको रकम ठूलो नहुन सक्छ, तर यसमा पीडितप्रतिको हाम्रो संवेदना र मानवताको भावना जोडिएको छ। यो सहयोगले कम्तीमा विपत्तिमा परेका एउटा परिवारलाई केही राहत पुग्छ भने पनि हाम्रो प्रयास सार्थक हुन्छ।’
श्रेष्ठले विपद्का बेला सरकारको मात्रै जिम्मेवारी नभई समाजका हरेक व्यक्ति, व्यवसायी तथा संस्थाले आफ्नो क्षमताअनुसार सहयोग गर्नुपर्ने बताए।
‘विपत्ति कसैको व्यक्तिगत समस्या होइन, यो सामाजिक समस्या हो। राज्यले आफ्नो जिम्मेवारी निर्वाह गर्छ, तर नागरिक र निजी क्षेत्रले पनि आफ्नो सामाजिक दायित्व बिर्सनु हुँदैन,’ उनले भने, ‘पीडितलाई अहिले भाषणभन्दा राहत चाहिएको छ। त्यसैले आफ्नो क्षमताले भ्याएसम्म तत्काल सहयोग गर्नु नै मानवीय कर्तव्य हो।’
गणपति डेन्टल क्लिनिकका सञ्चालकसमेत रहेका डा. श्रेष्ठ चिकित्सा पेसासँगै सामाजिक तथा मानवीय सेवामा पनि सक्रिय रहँदै आएका छन्। प्राकृतिक विपत्ति, आपत्कालीन अवस्था तथा समस्यामा परेका नागरिकलाई आफ्नो क्षेत्रबाट सहयोग गर्ने कार्यलाई उनले सामाजिक उत्तरदायित्वका रूपमा लिँदै आएका छन्।
‘मानिसको जीवन बचाउनु र दुःखमा परेको मानिसलाई साथ दिनु नै हाम्रो पेसाको मूल भावना हो। हस्पिटलमा उपचार गर्न आउने बिरामी होस् वा विपत्तिमा परेर सहयोग खोजिरहेको नागरिक—मानवीय संवेदना सबैका लागि समान हुनुपर्छ,’ उनले भने।
भोटेकोशी नदीमा आएको बाढीबाट रसुवा र नुवाकोटका विभिन्न क्षेत्रमा जनजीवन प्रभावित बनेपछि पीडितको राहत तथा उद्धारका लागि सहयोग जुटाउने क्रम जारी छ। यही क्रममा लाइफ लाइन जनरल हस्पिटलसहित प्रवासमा रहेका नेपालीबाट समेत सहयोग जुटाएर प्रधानमन्त्री दैवी प्रकोप उद्धार कोषमा रकम प्रदान गरिएको हो।
Discussion about this post