बाँके पुस २२ गते ।
बाँकेको राप्तीसोनारीमा बाघले आज मान्छे खाएको छ । राप्तीसोनारी गाउँपालिका ४ पर्सोना गाउँकी ५२ बर्षीया लिला बिष्टलाई बाघले खाएको हो ।
घास काट्न जंगल गएको बेला विष्टलार्ई बाघले खाएको प्रहरीले जनाएको छ । स्थानीय ३ जना महिलाहरुसंँगै गएको बेला जलहन सामुदायिक बनको तीन पाने स्थानमा बाघले विष्टलाई खाएको हो ।
अरु दुई जना भने भागेर ज्यान जोगाउन सफल भएका छन् । इलाका प्रहरी कार्यालय धामपुरको प्रहरी टोली र संयौको संख्यामा गएको स्थानीय बासिन्दाहरुले बाघले खाइरहेको अवस्थामा महिलाको शव फेला पारेका हुन् ।
बाघले मान्छेहरुलाई देखेर पनि शवलाई नछोडेपछि प्रहरीले २ राउण्ड हवाई फायर समेत गरेको थियो । जिल्ला प्रहरी कार्यालय बाँकेको आदेशमा प्रहरीले बाघ धपाउन हवाई फायर गरेको हो ।
इलाका प्रहरी कार्यालय धामपुरका प्रहरी इञ्चार्ज प्रहरी नायव निरीक्षक मुकुन्द सिग्देलले पहिलो राउण्ड प्रहार गर्दा बाघले उल्टै झम्टीन खोजेको बताउँदै दोस्रो राउण्ड गोली प्रहार गर्दा मात्रै बाघ भागेको जानकारी दिनुभयो ।
यसअघि हिंजो राप्तीसोनारी गाउँपालिका ३ मा जंगल गएकी महिलामाथि पनि बाघले आक्रमण गरेको थियो ।
तर ति महिलाले प्रतिकार गरेर आफ्नो ज्यान जोगाउन सफल भएकी थिइन् । बाघले मान्छेमाथि आक्रमण गर्न थालेपछि त्यसक्षेत्रका स्थानीयबासीहरु त्रसित बनेका छन् ।
Discussion about this post