खोजखबर संवाददाता बाँके असार ३ गते । नेपाल सरकारका सहरी विकास मन्त्री मोहम्मद इस्तियाक राईले नेपालगञ्जलाई ग्रिन सिटी बनाउने उदेश्यले यही असारको मध्यबाट दस हजार रुख विरुवा रोप्ने अभियानको शुरुवात गरिने बताउनु भएको छ ।
हरियो रुख विरुवा घट्दै जाँदा नेपालगन्जमा गर्मी अत्याधिक बढ्दै गएको र सहरको वातावरण समेत प्रदुषित हुँदै गएकोले रुख विरुवा रोप्ने अभियान थालनी गर्न लागिएको मन्त्री राइले बताउनु भयो ।
असार महिनाको मध्यबाट सो अभियानको शुरुवात गरिने उदेश्यका साथ अहिले रुख विरुवा छनोट गर्ने कार्य भैरहेको उहाँले बताउनु भयो । उहाँले आवश्यक परे भारतको कोलकताबाट समेत रुख बिरुवा ल्याउने गृह कार्य शुरु गरिएको पनि बताउनु भयो ।
अहिले रुख विरुवा रोप्नका लागि गर्नु पर्ने सबै प्रक्रियाहरु पुरा गर्ने कार्य तिव्र गतिमा भैरहेको मन्त्रालयले जनाएको छ ।
शुरुमा नेपालगन्ज उपमहानगरपालिकामा र पछि गएर क्रमशः आवश्यकता अनुसार देशका अन्य सहरहरुमा समेत गरेर करिब ७० हजार रुख विरुवा रोपिने योजना रहेको मन्त्री राईले जनाउनु भयो । रुख विरुवा रोप्ने अभियानको शुरुवात गरिने तथा सो कार्यमा निजि क्षेत्रको समेत सहयोग लिइने उहाँले बताउनु भयो ।
नेपालगन्जमा पछिल्लो समयमा निर्माण विकासका कामहरु धेरै भएकोले त्यहाँ रहेका करिब सबै पुराना रुखहरु काटिएको हुँदा नयाँ रुख विरुवा लगाउनु अनिवार्य भएको जनाउँदै आफुले नगरमा दस हजार विरुवा रोप्ने योजना बनाएको सहरी विकास मन्त्री राईले जनाउनु भयो ।
देशकै सबैभन्दा धेरै गर्मी हुने सहरका रुपमा रहेको नेपालगन्जमा हरियो रुख विरुवा नहुँदा गर्मी अत्याधिक हुने गरेको ठहर गर्दै त्यसको एउटा विकल्पका रुपमा सहरमा रुख विरुवा रोपिने मन्त्री राईले बताउनु भयो ।
विकास निर्माणमा धेरै पछाडी परेको यो सहरको भौतिक विकासमा सबै बढि केन्द्रित भएकोले सोही क्रममा रुखहरु काटिएको र अब सडक निर्माणहरु अन्तिम चरणमा पुगि सकेकोले अब रुख विरुवा रोप्ने तिर केन्द्रित भएको उहाँले बताउनु भयो ।
सडक पूर्वाधारको काम गर्दा नेपालगन्जमा रहेका दर्जनौ रुखहरु काट्नुपरेको थियो । सोही कारणले दस हजार ठुला रुखका विरुवा रोप्ने योजना बनाईएको हो । मन्त्री राईले भन्नुभयो,–‘असाध्यै गर्मी हुने नेपालगन्जलाई चारैतिर हराभरा बनाइने छ । त्यसैका लागि दस हजार ठुला रुखका बिरुवा रोप्ने योजना बनाएको छु ।
मन्त्री राईले नेपालगन्ज उपमहानगरपालिकासंग सहकार्य गरेर सो कामको थालनी गरिने बताउनुभयो । ‘उपमहानगरपालिकाले पनि विरुवा रोप्ने कार्यमा सहयोग गर्नेछ ।’–मन्त्री राईले भन्नुभयो ।
अधिकांस ठाउँमा सडक बिस्तार भइसकेको र विरुवा रोप्नका लागि आवश्यक पर्ने खाली ठाउँको व्यवस्था गरिरहेको जनाउँदै नेपालगन्ज उपमहानगरपालिका प्रमुख डा. धवल शमशेर राणाले सहरी विकास मन्त्रालयसंग सहकार्य गरेर विरुवा रापिने बताउनु भयो ।
बिरुवा लगाउँदा ठुलो हुन समय लाग्ने भएकाले सम्भवत केही ठुला रुख नै उच्च प्रविधिको प्रयोग गरेर लगाउने योजना बनाईएको प्रमुख राणाले बताउनु भयो ।
नेपालगन्ज नगरको सुर्खेत रोड र न्यू रोडमा पहिले रोपिएका विरुवाहरुको संरक्षणका लागि पनि विशेष व्यवस्था मिलाउने काम तिव्र गतिमा भैरहेको नेपालगन्ज उपमहानगरपालिकाले जनाएको छ ।
Discussion about this post