बाँके फागुन ४ गते ।
अमेरिकी सहयोग परियोजना (एमसीसी) को विरोधमा आव्हान गरिएको बन्दका कारण पश्चिम नेपालको जनजीवन प्रभावित भएको छ । बन्दकर्ताहरुले बाँकेमा मन्त्रालयको गाडीतोडफोड गरेका छन् भने केही बन्दकर्तालाई प्रहरीले नियन्त्रणमा पनि लिएको छ ।
विभिन्न ६ दलीय मोर्चाले एमसीसीको विरोधमा आव्हान गरेको बन्दका कारण यातायात, कलकारखाना, शिक्षण संस्था, बजार प्रभावित भएको छ । बन्द अवेज्ञा गरेको भन्दै बाँकेको बैजनाथ गाउँपालिकामा सुदुरपश्चिम प्रदेशको कृषि मन्त्रालयको गाडि तोडफोड गरिएको छ ।
पूर्वपश्चिम राजमार्ग अन्तरर्गत बैजनाथको बनकटवा चोकमा बिहान साढे ५ बजेतिर बन्दकर्ताले सुदुरपश्चिम प्रदेशको कृषि मन्त्रालयको गाडिमा तोडफोड गरेको ट्राफिक प्रहरी प्रमुख हिमालय शाहले जानकारी दिनुभयो ।
यस्तै नेपालगन्जबाट तीनजना बन्दकर्तालाई नियन्त्रणमा लिएको प्रहरीले जनाएको छ । जबर्जस्ति बन्द गराउँदै हिडेका नेकपा माओवादी केन्द्र समाजवादीका केन्द्रिय सदस्य सलमान राई, जिल्ला अध्यक्ष अजित प्रसाद र बिप्लव नेतृत्वको नेकपाका कार्यकर्ता वसन्त खत्रीलाई गणेशमान चोकबाट नियन्त्रणमा लिइएको बाँकेका प्रहरी प्रवक्ता मधूसुदन न्यौपानेले जानकारी दिनुभयो ।
बन्दका कारण नेपालगन्ज तथा कोहलपुरबाट छुट्ने लामो तथा छोटो दुरीका सवारीसाधन संचालनमा आएका छैनन् । नेत्रविक्रम चन्द नेतृत्वको नेकपालगायतका कम्युनिष्ट पार्टी र मोर्चाले राष्ट्रघाती एमसीसी सम्झौता संसदबाट अनुमोदन गरिए देशलाई घात हुने भन्दै त्यसको विरोधमा नेपाल बन्द गरेका हुन् । सम्भावित घटनालाई मध्यनजर गरेर प्रहरीले विहानैदेखि सडकमा सुरक्षा बढाएको छ ।
नेपालगन्ज, कोहलपुरलगायतका बजारक्षेत्रमा प्रहरीको उपस्थिति बढाइएको छ । नेपाल प्रहरीसँगै सशस्त्र प्रहरी पनि परिचालन गरिएको छ।
Discussion about this post