बाँके फागुन १७ गते ।
नेपाली कांग्रेसका केन्द्रिय सदस्य मैकुलाल बाल्मिकीले सुरेन्द्र बहादुर हमाल संस्थापन समूहको आधिकारिक उम्मेदवार भएको घोषणा गरेका छन् ।
नेपालगञ्जमा आज पत्रकार सम्मेलन गरेर केन्द्रिय सदस्य बाल्मिकीले केन्द्रबाट आएको निर्देशन अनुसार आफूले बाँके कांग्रेसको सभापतिका उम्मेदवार हमाललाई आधिकारिक उम्मेदवार घोषणा गरेको बताएका हुन् ।
बाल्मिकीले आफूले हिजै यही कुरा पार्टीका नेता कार्यकर्ता र पत्रकारहरुलाई जानकारी गराएको बताउँदै आज औपचारिक घोषणा गरेको प्रष्ट पारे ।
पत्रकार सम्मेलनमा सभापतिका उम्मेदवार हमालले केन्द्रबाट नै आफूलाई आधिकारिक उम्मेदवार भनिसकेपछि अब विवाद गर्न जरुरी नरहेको बताए ।
“हामी पहिला दुई जना उम्मेदवार मिल्न सकेको भए राम्रो हुन्थ्यो, तर नमिलिसकेपछि त केन्द्रले निर्णय गर्नुपर्ने थियो, गर्यो, अब यसलाई मानेर हामी जानुपर्छ,“ उनले भने, “केन्द्रिय सदस्यले मलाई नै आधिकरिक घोषणा गरिसकेपछि बादशाहजीले मलाई सहृदय समर्थन गर्छु भन्नु पथ्र्यो,“ हमालले अगाडि भने, “केन्द्रले बादशाहजीलाई आधिकारिक भनेको भए मैले त्यसलाई मानेर अघि बढ्थे, मैले समर्थन गर्थे, तपाईंहरु सबैलाई थाहा छ, म खेलकुदको मान्छे, नियम कानुनलाई मान्छु ।“
बाँकेमा संस्थापन समूहले सभापतिमा सहमति नजुटेपछि पदाधिकारीमा भने एउटै टिम बनाएको थियो । तर, केन्द्रिय सदस्य बाल्मिकीले उक्त टिम आफूलाई थाहा नै नदिएर मनोमानी ढंगले बनाएको भन्दै पत्रकार सम्मेलनमै आपत्ति जनाएका छन् ।
बादशाहले पनि आज विहान पत्रकार सम्मेलन गरेर आफू पनि संस्थापनकै उम्मेदवार भएको भन्दै कुनै हालतमा ब्याक नहुने बताएका छन् ।
उनले त्यस्तो प्रतिक्रिया दिएपछि केन्द्रिय सदस्य बाल्मिकीले पनि पत्रकार सम्मेलन गरेर केन्द्रको निर्देशन अनुसार हमाललाई आधिकारिक घोषणा गरेका हुन् ।
Discussion about this post