काठमाडौं चैत २२ गते ।
लुम्बिनी प्रदेशमा सत्तारुढ गठबन्धनमा रहेका दलहरुले जिल्लास्तरमा चुनावी तालमेलको तयारी थालेका छन्। सबैभन्दा पहिले अर्घाखाँची जिल्लामा गठबन्धन बनाएरै चुनावी अभियान शुरु भएको छ भने अरु जिल्लाहरुमा पनि सत्तारुढ गठबन्धनमा रहेका दलहरुले चुनावी अभियानकै क्रममा विगतको चुनावको नतिजालाई आधार मानेर तालमेलको तयारी थालेका हुन्।
यसअघि २०७४ को निर्वाचनमा दलहरुले प्राप्त गरेको मतको आधारमा उम्मेदवारी बाँडफाँटको तयारी यी दलहरुको छ। सत्तारुढ दलहरु नेपाली कांग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी पार्टी र राष्ट्रिय जनमोर्चाले पार्टीले विगतमा ल्याएको मत र त्यसयताको अवस्थाबारे विश्लेषण गरिरहेका ती दलका नेताहरुले जनाएका छन्।
उनीहरुका अनुसार स्थानीय तहको निर्वाचनमा विगतको मतको आधार, उम्मेदवारको लोकप्रियताका आधारमा तालमेल गरेर चुनावी मैदानमा जाने अन्तिम तयारी भइरहेको छ। नेताहरुले यसअघि गाउँनगरका प्रमुखरअध्यक्ष र उपप्रमुखरउपाध्यक्षमा मात्रै तालमेल भएका कारण अधिकांश स्थानमा अपेक्षित नतिजा नआएकाले वडास्तरदेखि नै तालमेल गर्ने तयारी गरेको बताएका छन्।
नेपाली कांग्रेस लुम्बिनी प्रदेशका सभापति अमरबहादुर पुनले गठबन्धन दलभित्र पार्टीहरुले आ–आफ्नो मताधार संकलन गरिरहेको र त्यसैका आधारमा कुन स्थानीय तहमा कसको नेतृत्वमा जाने र कसरी गठबन्धनभित्र जिम्मेवारी बाँडफाँट हुने तय गरिने बताए। उनले गठबन्धनले साझा उमेदवार तय गरेर तालमेललाई अक्षरशः पालना हुनेगरी चुनावी मैदानमा जाने बताए।
‘जहाँ जसको नेतृत्वमा जाँदा सहज जित हासिल हुन्छ, त्यसरी नै तालमेल हुनेछ, ‘ उनले भने, ‘यसो गर्दा गठबन्धनमा रहेका कुनै पनि दलले हार्नुपर्ने छैन, वडास्तरबाटै तालमेल गरेर अघि बढिनेछ र सबै ठाउँमा गठबन्धनका साझा उमेदवारहरु चुनावी मैदानमा हुनेछन्।‘ यस्तो तालमेलका लागि जिल्ला जिल्लामा संयन्त्र बनाउने र सोहीअनुसार सहमति गरेर तालमेल गर्ने तयारी भइरहेको उनले बताए। जसअनुसार अर्घाखाँची र रुपन्देहीमा पनि संयन्त्र तयार भएको छ।
बाँकी रहेका १० जिल्लामा पनि संयन्त्र बनाएर जाने नेकपा माओवादी केन्द्रका केन्द्रीय सदस्य तुलाराम घर्ती बताउँछन्। उनले प्रदेशका सबै स्थानीय तहहरुमा आफ्नो पार्टीले सर्कुलर गरेको र जसअनुसार पालिकामा निर्वाचन संयन्त्र परिचालन समिति गठनको छलफल भइरहेको बताए। कपिलवस्तु, नवलपरासी पश्चिम र गुल्मी जिल्लामा केही दिनभित्रै संयन्त्र गठन हुने उनले बताए।
सत्तारुढ गठबन्धनका प्रदेश समितिहरु पनि जिल्लास्तरमा संयन्त्र बनाउन र तालमेललाई बलियो बनाउन सक्रिय देखिएका छन्। जसअनुसार प्रदेशस्तरमा गठबन्धनमा रहेका दलका प्रदेशस्तरका बैठकहरु भइरहेको घर्तीले बताए। सत्तारुढ दलहरु चुनावी तालमेलमा व्यस्त रहँदा नेकपा एमालेले भने एक्लै लड्ने वा तालमेल गर्ने भन्ने टुंगो लगाएको छैन।
एमाले अध्यक्ष ओली र राप्रपा नेताहरुबीच छलफल भएपनि तालमेलको टुंगो नलागेपछि नेताहरु एमाले एक्लै चुनावी मैदानमा जाने बताउँछन्।
नेकपा एमालेका पोलिटब्यूरो सदस्य दधिराम न्यौपाने एमालेलाई जस्तोसुकै गठबन्धनले पनि फरक नपार्ने बताउँछन्। उनले लुम्बिनी प्रदेशमा आफ्नो पार्टीले अधिकांश तहमा जित्ने दाबी गर्छन्।
Discussion about this post