बाँके बैशाख २२ गते ।
नेपालगन्ज उपमहानगरपालिका वडा नम्बर ७ मा नेकपा एमालेले पहिलो चरणमा सबै टोलमा घरदैलो सम्पन्न गरेको छ । वडाअध्यक्ष पदका उम्मेदवार प्रशान्त श्रेष्ठसहित सदस्य पदका उम्मेदवार र कार्यकर्ताले घरदैलो गरेका हुन् ।
सबै टोलमा पुगेर यसपटक नेकपा एमाले उम्मेदवारलाई निर्वाचित गराउन मतदातालाई अनुरोध गरिएको वडाअध्यक्षका उम्मेदवार श्रेष्ठले बताए ।
‘हामी जुन टोलमा जादाँ पनि मतदाताहरुले हौसला दिइरहनु भएको छ, अधिकांस मतदाताले विगतको जस्तो गल्ती नगरी नेकपा एमालेलाई यसपटक भोट दिएर जिताउने वचन दिइरहनु भएको छ,’ श्रेष्ठले भने ।
श्रेष्ठले विकास निर्माणका कामलाई अगाडि बढाउन आफु उम्मेदवार बनेको बताएका छन् । अघिल्ला जनप्रतिनिधिले कुनैपनि काम गर्न नसकेको भन्दै आफु विजयी भए वडाको विकास गरिने बताए ।
उनले शिक्षा, स्वास्थ्य र भौतिक पूर्वाधार निर्माणलाई जोड दिएका छन् । नेपालगन्ज उपमहानगरपालिका ७ मा यसअघिका वडाअध्यक्ष जुम्मन खाँले वडाको विकास निर्माणमा पक्षपात गरेको स्थानीयहरु बताउँछन् ।
Discussion about this post