बाँके बैशाख २४ गते ।
नेपालगन्ज उपमहानगरपालिका राप्रपाका उम्मेदवार नन्दलाल वैश्यले गर्न सक्ने कुरामात्र बोल्ने गरेको बताएका छन् । स्पष्ट बक्ताको रुपमा परिचय बनाएका उनलाई सम्पत्तीको मोह पनि छैन ।
उनले राजनीतिलाई सेवाको रुपमा लिएको बताउँदै मेयर भएपछि पाउने सरकारी तलव र भत्ता नलिने प्रतिबद्धता जनाएका छन् । ‘सम्पत्ती कमाउने भन्दा जनताको सेवा गर्ने मेरो मुख्य उद्देश्य हो,’ उनले भने, ‘राजनीतिलाई ब्यवसाय बनाउने प्रबृत्तीको अन्त्यका लागि मेरो उम्मेदवारी हो ।’
उनी नेपालगन्जका प्रतिष्ठित ब्यापारी हुन् । नेपालगन्ज उद्योग बाणिज्य संघको सदस्यबाट सेवा थालेका उनले अध्यक्ष भएर धेरै उद्योगी, ब्यवसायीको हितमा काम गरिसकेका छन् । ‘पैँसा कमाउने उद्देश्य हुन्थ्यो भने म ब्यापार छाडेर राजनीतिमा आउने थिएन,’ उनले भने, ‘मलाई पैँसा नभई जनताको प्यार चाहिएको छ ।’
उनले आफूले मेयरमा जिते सरकारी कार्यालयमा हुने भ्रष्टाचार न्यूनिकरणका लागि पहल गर्ने स्पष्ट पारेका छन् । त्यसैले उनले आफ्नो प्रतिवद्धता पत्रमा भ्रष्टाचार न्यूनिकरण गर्ने, राज्यले दिने सेवा, सुविधा नलिने उल्लेख गरेका छन् । ‘मलाई कुनै किसिमको सेवा, सुविधाको मोह छैन, बस जनताको सेवा गर्न पाए पुग्छ,’ बैश्यले भने ।
उनले सहरमा विकास भइसकेकोले नेपालगन्जको गाउँ क्षेत्रको विकासमा जोड दिने बताएका छन् । ‘अहिलेसम्म सहर केन्द्रित विकास भयो, अव सहर भित्रको गाँउको विकास आवश्यक छ,’ उनले भने । कारणले अबको विकास गाँउ तिर गर्नेमा जोड दिने बताए ।
Discussion about this post