बाँके असार १२ गते ।
लागुऔषध दुरुपयोग तथा ओसारपसारविरुद्धको दिवसमा प्रभातफेरी कार्यक्रमको आयोजना गरिएको छ । जिल्ला प्रशासन कार्यालयबाट सुरु भएको प्रभातफेरीले नगरका विभिन्न भागको परिक्रमा गरि बसपार्क पुगेर समापन हुनेछ ।
दिवसको अवसर पारेर बाँकेमा सप्ताहव्यापी विविध कार्यक्रम गरिएका छन् । जिल्ला प्रशासन कार्यालयको समन्वयमा लागुऔषधविरुद्ध काम गरिरहेका संघ संस्थाले जनचेतनामूलक विविध गतिविधि गरेका हुन् ।
लागुऔषधविरुद्धका जिंगलमार्फत प्रचारप्रसार , चोक तथा सार्वजनिक स्थलहरूमा सचेतना , नाकामा चेतनामूलक कार्यक्रमसँगै अन्तरक्रिया र रक्तदान गरिएको छ ।
गत आर्थिक वर्षमा बाँकेमा लागुऔषध मुद्दामा कुल १९६ जना पक्राउ परेको थियो । जसमा १८५ पुरुष र ११ महिला रहेकोमा १२६ जनालाई मुद्दा चलाइएको थियो ।
चालु आर्थिक वर्षको असार पहिलो सातासम्म १८५ जना पक्राउ परेका छन् । जसमा १७५ पुरुष र १० जना महिला रहेका छन् भने ११२ जनालाई मुद्दा चलाइएको छ ।
पछिल्लो तथ्यांक अनुसार जिल्लामा ट्याब्लेटको कारोबार बढेको देखिन्छ । गतवर्ष भन्दा चालु आर्थिक वर्षमा नाइट्रोजन र ट्रामाडोल दोब्बर बढी पक्राउ गरिएको छ ।
Discussion about this post