बाँके असार १८ गते ।
बाँकेका सुनचाँदी व्यवसायीहरुले राज्यको नीतिगत उल्झनका कारण व्यवसायीहरुले विभिन्न खाले समस्या झेल्नु परेको गुनासो सुनाएका छन् ।
नेपालगन्जमा आज आयोजित नेपालगन्ज सुनचाँदी व्यवसायी संघको साधारणसभामा सहभागी सुनचाँदी व्यवसायीहरुले राज्यको नीतिगत समस्याका कारण व्यवसायीहरु प्रताडित बन्नु परेका गुनासो सुनाएका हुन् ।
उनीहरुले सुन व्यवसायीहरुको समस्या सम्वोधनमा राज्यले पहलै नलिएको समेत आरोप लगाए । यहाँसम्मकी उनीहरुले सुन व्यवासायीको समस्या सम्वोधन गर्न सुन व्यवसायीबाटै गृहमन्त्री र अर्थमन्त्री बन्नु पर्ने हो भन्दै व्याङ्ग्यात्मक टिप्पणी समेत गरेका थिए ।
नेपाल सुनचाँदी व्यवसायी महासंघका अध्यक्ष मालिकरत्न शाक्यले सुनचाँदी व्यवसायीको सवालमा राज्यले स्पष्ट नीतिगत निर्णय लिन नसक्दा सुन व्यवसायीहरु प्रहरी प्रशासनबाट पीडित बनेको गुनासो गर्नुभयो ।
नेपालगन्ज उपमहानगरपालिकाका नगर प्रमुख प्रशान्त विष्टले कालिगढहरुलाई सीपमूलक तालिम दिएर सुनचाँदी व्यवसायीहरुसँग सहकार्यका लागि स्थानीय सरकार प्रतिबद्धत रहेको बताउनुभयो ।
संघका बाँके अध्यक्ष सलाउद्दिन जसगढको सभापतित्वमा भएको कार्यक्रममा सुनचाँदी व्यवसायी संघका लुम्बिनी प्रदेश अध्यक्ष बुद्धिबहादुर विक, सुदूरपश्चिम अध्यक्ष सन्तोष लामिछाने, नेपाल पत्रकार महासंघ लुम्बिनी प्रदेश सदस्य आरिफ अन्सारी, नेपालगन्ज उद्योग बाणिज्य संघका अध्यक्ष अब्दुल वाहिद मन्सुरी, सुनचाँदी व्यवसायी संघका कोषाध्यक्ष शुकनारायण सोनीलगायतले बोल्नुभएको थियो ।
Discussion about this post