बाँके असोज ६ गते ।
दुर्घटना न्यूनीकरणका लागि जिल्ला ट्राफिक प्रहरी बाँकेले दैनिक चेक जाँचलाई तीव्र पारेको छ । नजिकिँदै गरेको दशैं–तिहार लगायतका चाडपर्वमा दुर्घटना हुन सक्ने भन्दै यसको नियन्त्रणका लागि चेकजाच सुरु गरेको हो ।
जिल्लामा दुर्घटना हुन नदिन बाँके ट्राफिक प्रहरीले मापसे जाँच, सवारी जाँच, यात्रु क्षमता जाँच लगायतमा ध्यान दिएको जिल्ला ट्राफिक प्रहरी कार्यालय बाँकेका प्रमुख हिमालय शाहले बताए ।
दुर्घटना सँगसँगै चाडपर्वको समयमा सवारीसाधनबाट हुनसक्ने ठगी र यात्रुलाई सहजै गन्तव्यसम्म पुग्ने वातावरण तयार पार्न बाँकेका विभिन्न स्थानमा ट्राफिक प्रहरीको विशेष चेकिङ सुरु गरिएको उनले जानकारी दिए ।
सो क्रममा लामो दूरीका सवारीसाधनलाई लक्षित गर्दै बाँके भित्रिने तथा बाहिरिने सवारी साधनमाथि विशेष चेकजाँच बढाइएको उनको भनाइ छ ।
बाँके पूर्वमा कुसुम, पश्चिममा मानखोला, उत्तरमा चिसापानी, दक्षिणमा नेपालगञ्ज, राँझा चोक र कोहलपुरको चपरगौडी लगायतका स्थानमा लामो दूरीका सवारीसाधनलाई विशेष चेकजाँचको व्यवस्था गरिएको उनले बताए ।
Discussion about this post