काठमाडौं पूस १९ गते ।
नेपाल टी २० लिग मंगलबारबाट अनिश्चित बनेको छ। प्राविधिक समितिले टिमलाई उपलब्ध गराउने खेलाडी सूची टिमहरूले बुझ्न नमानेपछि मंगलबार हुने भनिएको दिनको पहिलो खेल अनिश्चित बनेको हो।
पहिलो खेलमा विराटनगर सुपर किङ्गस् र काठमाडौँ नाइट्सबीच खेल हुने कार्यतालिका रहे पनि टस नै हुन नसकेको हो। खेलाडीहरूले पारिश्रमिक नपाएको भन्दै खेल्न अस्वीकार गरेका हुन्।
सुरुवातबाटै विवादित बनेको नेपाल टी(२० लिग पटक(पटक स्थगित गरेर आयोजना गरेको थियो।तर प्रतियोगिता ६० प्रतिशत सम्पन्न हुँदासम्म खेलाडीले पारिश्रमिक नपाएपछि प्रतियोगिता बीचमा नै रोकिन पुगेको छ। विभिन्न टिमका मालिकहरू समेत क्यानको सम्पर्कमा छैनन्।
८ वर्षका लागि भारतीय कम्पनी सेभेन थ्री स्पोर्टसलाई क्यानले ३३ करोडमा नेपाल टी २० को स्वामित्व हस्तान्तरण गरेको थियो। तर पहिलो वर्ष नै आयोजकको भागाभाग भएको हो। आयोजक सेभेन थ्री स्पोर्टसका संस्थापक जतिन बहलुवालिया भारत पुगेको दावी गरिएको छ।खेलाडीले पारिश्रमिक नपाएपछि नखेल्ने अडानका कारण ८ः ३० मा हुनु पर्ने टस हुन सकेको छैन।
अहिले नेपाल टी २० का गर्भर्निङ काउन्सिलका अध्यक्ष प्रशान्त मल्ल, नेपाल टी २० लिग प्रतियोगिताका निर्देशक तथा क्यानका महाप्रबन्धक वृतान्त खनाल तथा क्यानका क्रिकेट म्यानेजर विनोद दास लगायतको टोलीले खेलाडीलाई सम्झाउनलाई बैठक बसिरहेको भए पनि कुनै टुंगो लाग्न सकेको छैन।
खेलाडीहरूले सम्झौता अनसार खेल सुरु हुनुअघि ४० प्रतिशत र प्रतियोगिता चलिरहँदा ६० प्रतिशत रकम पाउने सम्झौता भए पनि पोखराका खेलाडीबाहेक अन्यले एक पैसा पनि पारिश्रमिक नपाएको दावी गरेका छन्। पोखराका खेलाडीले भने ५० प्रतिशत पारिश्रमिक पाएको दावी गरिएको छ।
Discussion about this post