बाँके पुस ३० गते ।
गृहमन्त्री रवि लामिछानेको निर्देशनपछि बाँके प्रहरीले भारतबाट हुने अवैध तस्करी नियन्त्रणमा कडाइ गरेको छ ।
भारतबाट भन्सार छलेर भित्र्याउने तस्करहरुमाथि निगरानी बढाएसँगै नेपालगन्जको बसपार्कबाट करिव तीन लाख मूल्यको अवैध सामान बरामद भएको प्रहरीले जनाएको छ ।
नेपालगन्ज उपमहानगरपालिका ४ बसपार्क नजिकैबाट कुर्ता, सल, कुर्ति बरामद भएको छ । उलनको कुर्ता १६३ पिस, उलनको सल ११४ पिस र कुर्ति २४ जना बरामद भएको हो ।
बरामद गरिएको सामानको मूल्य दुई लाख ९१ हजार २८० रुपैयाँ रहेको प्रहरीले जनाएको छ ।
नेपालगन्जको जमुनाह नाकामा कडाइ
जमुनाह प्रहरीले चिनि, सेलो पेन, सुपर पावर सुर्ति, जेन्स सुट कपडा, भेलि, लेडिज उनि सुट, पिठो नाकाको पूर्व जमुनाह गाउँबाट अवैध सामग्री बरामद गरेको छ । उक्त सामानको अन्दाजी मुल्य एक लाख १२ हजार रहेको छ ।
जमुनाह प्रहरीका वरिष्ठ सई पूर्ण विक नेतृत्वको टोलीले नियन्त्रणमा लिएको छ । जमुनाह नाकाको पूर्व जमुनाह गाउँबाट अवैध सामग्री बरामद भएको विकले बताउनुभयो । ‘नाका भन्ने बित्तिकै जमुनाह नाका मात्र बुझिन्छ,’ वरिष्ठ सई विकले भन्नुभयो, ’भित्री नाकामा पनि तस्करहरुको चलखेल रोक्न सक्रिय छौं ।’
उपप्रधान तथा गृहमन्त्री रवि लामिछानेले अवैध तस्करी रोक्न देशैभरका सीडीओ तथा प्रहरी प्रमुखलाई निर्देशन दिएपछि बाँकेमा पनि कडाइ सुरु गर्न लागिएको हो । बाँकेका प्रहरी प्रमुख सन्तोष सिंह राठौरको निर्देशनमा वरिष्ठ सई विकलाई जमुनाह खटाइएको हो ।
नेपालगन्जका पोल्टी व्यवसायीहरुले गृहमन्त्री लामिछानेलाई भेटेरै भारतबाट हुने तस्करी नियन्त्रणको लागि ध्यानाकर्षण गराएका थिए । उनीहरुले खासगरी अवैध कुखुराका कारण आफुहरु मारमा परेको भन्दै त्यसलाई रोक्न माग गरेका थिए ।
त्यहीक्रममा गृहमन्त्री लामिछानेले आइजिपीलाई फोन गरेर चासो दिनुभएको थियो । उहाँले भारतबाट हुने अवैध तस्कर नियन्त्रणमा निमर्म हुने मातहतलाई निर्देशन समेत दिनुभएको थियो । बाँके प्रहरीले माथिल्लो तहको निर्देशन कार्यान्वयन गर्दै भारतबाट हुने अवैध तस्करी नियन्त्रणका लागि सक्रियता देखिएको हो ।
बाँकेका एसपी सन्तोषसिंह राठोरले अवैध तस्करी नियन्त्रणका लागि मातहतलाई कडा निर्देशन दिनुभएको बताउनुभएको छ । उहाँले खुला सीमानाको फाइदा उठाएर हुने तस्करी विरुद्ध प्रहरी निर्मम हुने चेतावनी दिनुभएको छ । उहाँले कमाण्ड सम्हाले लगत्तै गृहमन्त्री लामिछानेको निर्देशनलाई कडारुपमा कार्यान्वयन गर्न थाल्नुभएको छ ।
Discussion about this post