बाँके साउन ३२ गते ।
नरैनापुरका किसानले धान रोपाइँ गरिरहेका छन् । ढिलोगरि पानी परेका कारण अहिले पनि धान रोपाइँ भइरहेको नरैनापुर गाउँपालिका ५ मटेहियाका अगुवा विनय दिक्षितले बताए ।
उनले धान रोपाइँ अन्तिम चरणमा पुगेको जानकारी दिए । पछिल्लो पानीले अधिकांश किसानले धान रोपेर सकेको उनको भनाई छ । ‘नरैनापुरमा धान रोपाइँको काम अन्तिम चरणमा छ । पानी नपाएर बचेका केहि खेतमा मात्र रोपाइँ भइरहेको छ,’ उनले भने । नरैनापुर गाउँपालिका ४ खोदवाका होलिराम यादवले पनि रोपाइँ सकिनै लागेको बताए । उनले एकाध बाहेक अधिकांश किसानले रोपाइँ सकेको जानकारी दिए । ‘मेरो पनि रोप्ने यत्ति हो,’ धानका गरा देखाउँदै उनले भने, ‘मेरो पनि सकि सक्थ्यो । तिल मासेर धान रोपाइँ गर्दा ढिला भएको हो ।’
एक हप्ता अघि उराठ लाग्दा बाँझा खेतमा धान रोपाइँ भएपछि ति खेत अहिले सुन्दर देखिन थालेका छन् । पहिलेका रोपेका धान हरिया भइसकेका छन् । भर्खरै रोपेका धान हरियो हुने क्रममा छन् । ‘पानी नपरेर धान रोप्न नपाइने हो की भन्ने चिन्ता थियो । धन्न पानी परेर धान रोप्न पाइयो,’ नरैनापुर गाउँपालिका ५ मटेहियाका रामदयाल मौर्यले भने ।
नरैनापुरमा धान रोपाइँ लगभग सकिएको कृषि शाखा प्रमुख सदन भण्डारीले बताए । उनले ९० प्रतिशत धान रोपाइँ भएको बताए । ‘एक हप्ताअघि ४० प्रतिशत थियो । अहिले ९० प्रतिशत धान रोपाइँ सकिएको छ,’ उनले भने, ‘अव कतै–कतैमात्र रोप्न बाँकी छ ।’ उनले गत वर्षभन्दा यस वर्ष धान रोपाइँ सन्तोषजनक रहेको बताए ।
Discussion about this post