बाँके भदौ १३ गते ।
१० भदौ, २०८० रातीको करिव १०ः३० बजेको समयमा राजापुर नगरपालिकाका करिव ३५ वर्षिय प्रदिप थारु मोटरसाइकलबाट नेपालगन्ज उपमहानगरपालिका १ तेजनगरतर्फ जाँदै थिए । कामबाट फर्किदै गरेका उनी कारकाँदो–नन्दनी मिल सडक खण्डको तेजनगरस्थित बिच सडकमा बसेका छाडा गाईमा ठोकिए ।
गाईमा ठोकिएपछि घाइते भएका उनलाई स्थानीयको सहयोगमा नेपालगन्ज मेडिकल कलेज शिक्षण अस्पताल नेपालगन्ज पुर्याइयो । तर, चिकित्सकले उनलाई बचाउन सकेनन् । यो घटना त प्रतिनिधि मात्र हो ।
नेपालगन्ज, कोहलपुर, खजुरा, राँझा लगायत बाँकेका ठूला तथा साना सहरमा छाडा चौपायाले दुर्घटना निम्त्याइरहेका छन् । कयौँ घाइते भएका छन् भने कतिपयले ज्यान गुमाउन परेको छ ।
छाडा चौपायाले दुर्घटना निम्त्याएका मात्र छैनन्, नगरलाई कुरुप तथा दुर्गन्धित बनाइरहेका छन् । नेपालगन्जका मुख्य सडक तथा चोकहरूमा घोडा, खच्चड, गाई, गोरु लगायत छाडा चौपायाले सवारी आवागमनमा समस्या उत्पन्न गरेको सर्वसाधारण बताउँछन् ।
छाडा चौपाया समस्या समाधानप्रति नेपालगन्ज उपमहानगरपालिकाले प्रयास गरे पनि पशुधनीले आफ्ना पशु चौपाया जथाभावी छाडिदिँदा नियन्त्रण गर्न नसकिएको उपमेयर कमरुद्धिन राईले बताए । उनले नगरमा रहेका छाडा चौपायालाई कान्जी हाउसमा लगेर राखिने गरेको स्पष्ट पारे । ‘उपमहानगरले छाडा चौपाया कान्जी हाउसमा लगेर छाड्छ, तर पशुधनीले ल्याएर फेरि छाड्छन् । हामीले कान्जी हाउसमा लग्छौँ, पशुधनीले ल्याएर छाड्ने प्रतियोगिता चलिरहेको छ,’ उनले भने ।
शहरको मुख्य त्रिभुवन चोक, धम्बोझी चोक, बिपी चोक, पुष्पलाल चोक, गणेशमान चोकलगायत सुर्खेत रोड र सदरलाइनमा छाडा घोडा, खच्चड तथा गाईगोरु यत्रतत्र भेटिने गरेका छन् ।
जिल्ला प्रहरी कार्यालय प्रवक्ता नारायण डाँगीले छाडा चौपायाले दिउँसो र राति सवारी दुर्घटना बढाउने समस्या देखिएको बताएका छन् । उनले छाडा चौपायाका कारण सडक दुर्घटना बढिरहेको बताए ।
रातिको समयमा बिच सडकमा बसेका छाडा चौपायासँग सवारीसाधन ठोक्किँदा दुर्घटना हुने गरेको बताउँदै उनले नियन्त्रणका लागि सरोकारवाला निकायले पहल गर्नुपर्ने बताए । ‘आफ्ना चौपाया बजारमा ल्याएर छाड्नेलाई कारवाहीको दायरामा ल्याउन उपमहानगरले पहल थालोस, उपमहानगरको काममा बाँके प्रहरी सहयोग गर्न तयार छ,’ उनले भने ।
Discussion about this post