बाँके पुस २५ गते ।
मानखोला र करेली खोलाले हरेक वर्ष कटान गर्न थालेपछि त्यसको नियन्त्रणबारे पालिकाले अग्रसरता लिएको छ । चुनावी नारामा समेत मानखोला र करेली खोलाले पुर्याउने क्षती न्यूनीकरणको वाचा गरेका पालिका अध्यक्ष प्रकाश बहादुर शाहीले ती खोलाबाट हुने कटान नियन्त्रणको प्रयास सुरु गरेका छन् ।
बैजनाथ गाउँपालिका क्षेत्रमा स्थानीय खोलाले गरेको कटान नियन्त्रणको प्रयास थालिएपछि प्रभावित क्षेत्रका स्थानीयबासीमा आशा जागेको बताएका छन् । पक्की तटबन्ध निर्माण भएपछि कटान नियन्त्रणमा आउने स्थानीय बासिन्दाको अपेक्षा छ । बैजनाथस्थित मानखोला र करेली खोलाले हरेक वर्ष कटान गर्दै आएको छ ।
कटान नियन्त्रण गर्नका लागि बैजनाथ गाउँपालिकाले आवश्यक पहल सुरु गरेपछि आशाको संकेत मिलेको स्थानीय बताउँछन् । बैजनाथ गाउँपालिका अन्तर्गतका खोलामा तटबन्ध निर्माण गर्नका लागि चालु आर्थिक वर्षमा ३ करोड २५ लाख रुपैयाँ बजेट परेको छ । उक्त बजेटबाट तटबन्ध निर्माण गर्नुअघि कटान क्षेत्रको स्थलगत निरीक्षण गरिएको छ ।
गाउँपालिका अध्यक्ष प्रकाशबहादुर शाही, गाउँपालिका उपाध्यक्ष निर्मला रोकाय, वडा नम्बर १ का वडाअध्यक्ष रुपबहादुर मल्ल, वडा नम्बर २ का वडाअध्यक्ष राजु रुचाल सहित लुम्बिनी प्रदेश सरकार अन्तर्गतको सिचाइँ डिभिजन कार्यालय बाँकेका कर्मचारी लगायतले निरीक्षण गरेका हुन् ।
Discussion about this post