बाँके बैशाख ४ गते ।
नेपालगन्ज उपमहानगरपालिका वडा नम्बर २१ विर्ताकी राबिया खाँको आँशु नरोकिएको १६ दिन भएको छ । २२ वर्षिय छोरा अरबी खाँको चैत १८ गते राती घाँटी रेटेर हत्या भएको दिनदेखि राबिया खाँको आँखाबाट आँशु नरोकिएको हो । उनको दिनरात रोएर वित्छ । घरिघरि अर्धचेत भएर ढल्छिन् । बेहोसीमै बरबराउँछिन् । छोराको नाम लिएर बोलाउँछिन् । अनि छोरालाई फर्काई दिनु भन्दै अल्लाहसँग पुकार गर्छिन् ।
श्रीमानको हत्या भएको दिनदेखि मृतक अरबी खाँकी १८ वर्षीया पत्नी साहिबा खाँको पनि आँशु सुकेको छैन । श्रीमानको शोकमा रहेकी उनी बोल्नसमेत नसक्ने भएकी छन् ।
बैशाख ३ गते रिपोर्टिङका क्रममा उनी बेहोस भएर सासु राबियाको काखमा ढलिन् । बेहोस भएकी उनलाई आँगनको खटियामा सुताएर परिवारका सदस्यले पानी छम्किए, तर उनले लामो समयसम्म खाँखा खोलिनन् । आँखा र दाँत बन्द गरेकी उनलाई सासु राबियाले बोलाइन् । झक्झक्याइन, उठ्न आग्रह गरिन्, तर उनी बोलिनन् ।
श्रीमानलाई सम्झिने वित्तिकै उनी बेहोस हुन्छिन् । रातदिन रोइरहन्छिन् । खाना पनि खाँदिनन् । नसुतेर रात विताउने गरेको परिवारका सदस्य बताउँछन् । साहिबा र अरबीको विवाह १९ महिनाअघि इस्लामिक परम्परा अनुसार भएको थियो । अरबीको हत्या भएको रात साहिबा माइतीमा थिइन् । उनीहरुका सन्तान छैनन् ।
विभत्स तरिकाले हत्या भए पछि खाँ परिवार मात्र नभई पुरै गाउँ अहिले शोकमा छ । हत्यामा संलग्न ब्यक्तिको पहिचान हुन नसकेपछि मृतक अरबी खाँको परिवार थप पीडामा छ । खाँ परिवार राम्रोसँग निदाउन र खान सकेको छैन । रमजानको रोजा समेत बस्न पाएनन् ।
१९ औं रोजा बसेको खाँ परिवार खुसीका साथ रोजाको इफ्तार गर्दै आएको थियो । अरबीको हत्या भएको अवस्थामा शव फेला परेको दिनदेखि खाँको घरमा रुवाबासी छ । घरमा चुल्होसमेत बल्न छाडेको छ ।
उक्त दिनदेखि खानपिन र उठबसमा समस्या भएपछि परिवारका अधिकांश सदस्य विरामी भएका छन् । मुखमा आएको हिउँदे बालीसमेत भित्र्याउन नसक्ने अवस्था रहेको खाँ परिवारले गुनासो गरे ।
बाँकेका अधिकांश इस्लाम धर्मावलम्वीले धुमधामका साथ ईद–उल–फित्र (ईद) मनाए । तर, खाँ परिवारमात्र विर्ताका अधिकांश इस्लाम धर्मावलम्वीको ईद खल्लो भएको छ । छिमेकीको घरमा रुवाबासी भएकोले यस वर्षको ईद खुलेर मनाउन नसकेको छिमेकी बताउँछन् ।
प्रहरीले अनुसन्धान गरिरहेको आश्वासन दिए पनि उनीहरु प्रहरीको अनुसन्धान फितलो भएको गुनासो गर्छन् । प्रहरीले हत्यारा पत्ता लगाउने आशा मर्दै गएको मृतक अरवी खाँका काका अब्दुल रहमानले बताए । उनले हत्यारा पत्ता लागेमात्र आफूहरुलाई सन्तुष्टि मिल्ने बताए ।
Discussion about this post