बाँके बैशाख १० गते ।
सरकारले सशस्त्र प्रहरी बललाई भारतबाट अवैध रुपमा भित्रिने सामान नियन्त्रण गरि राजस्व बढाउने अधिकारसहित नेपाल–भारत सीमानाकामा खटाएको छ । नेपाल–भारत सीमा अन्तरगत दाङ र बर्दियाको सीमानासम्म अवैध तस्करी नियन्त्रणका लागि सशस्त्र प्रहरी परिचालन भएका छन् ।
खुल्ला नाकाका कारण हुने अवैध तस्करी नियन्त्रणका लागि नाकामा प्रहरी निरीक्षकको कमाण्डमा सशस्त्र प्रहरीको बोर्डर आउट पोष्ट (विओपी) स्थापना गरिएको छ । त्यसैगरी, मुख्य नाका नेपालगन्ज भन्सार कार्यालयभित्र डिएसपीको कमाण्डमा विओपी रहेको छ ।
उसो त नेपाल–भारत सीमाको नेपालतर्फ हरेक सय मिटरको दूरीमा सशस्त्र प्रहरीले २४ सै घण्टा ड्यूटी गर्छन् । तर, नेपालगन्जमा अवैध सामान भित्रिने क्रम रोकिएको छैन । सशस्त्र प्रहरीले तस्करी नियन्त्रणमा खटिएको दावी गरेपनि नेपाल प्रहरीले नेपालगन्जबाट दैनिकजसो अवैध सामान बरामद गरिरहेको छ ।
बाँके प्रहरीले आइतवार एकैदिन १२ लाख रुपैयाँ मूल्य बराबरको अवैध सामान नेपालगन्जबाट बरामद गरेपछि तस्करी नियन्त्रणको जिम्मा पाएको सशस्त्र प्रहरी तस्करसँग मिलेको पुष्टि भएको सर्वसाधारण बताउँछन् । ‘मुख्य नाकामा कडाई गरेको देखाउने सशस्त्र प्रहरीले सहायक नाकाबाट तस्करी गर्न तस्करलाई सघाईरहेको भन्ने प्रमाणित भएको छ । नत्र नेपाल प्रहरीले दैनिकजसो अवैध सामान किन बरामद गरिरहेको छ ?’ नेपालगन्ज उपमहानगरपालिका ४ का यूसुफ खानले भने ।
आइतवार वडा प्रहरी कार्यालयले नेपालगन्ज उपमहानगरपालिका २ घरबारी टोलस्थित खैरुन निशा शेषको घरबाट १० लाख आठ हजार ६० रुपैयाँ मूल्य पर्ने अवैध सामान बरामद गरेर नेपालगन्ज भन्सार कार्यालयमा बुझाएको छ ।
यसैगरी, आइतवार नै बाँके प्रहरीले नेपालगन्ज उपमहानगरपालिका ४ बसपार्कबाट दुई लाख ९२ हजार दुईसय ५० रुपैयाँ मूल्य बराबरको अबैध सामान बरामद गरि भन्सारमा दाखिला गरेको थियो ।
यसैगरी, बाँके प्रहरीले अबैध रुपमा नेपालबाट भारत तर्फ लैजादै गरेको खुकुरी चुरोट पनि आइतवार बरामद गरेको छ । नेपालबाट भारततर्फ लैजाँदै गरेको चुरोट प्रहरीले नेपालगन्ज उपमहानगरपालिका १५ जमुनाहबाट बरामद गरेको डिएसपी डाँगीले जानकारी दिए ।
यी अवैध सामान सशस्त्र प्रहरीको अगाडीबाट आउने गरेको छ । नाकामा छ्याप्छ्याप्ती रहेका सशस्त्र प्रहरीलाई छलेर तस्करले सामान ल्याउन सक्ने कुनै चान्स छैन । तर, लाखौँ रुपैयाँ पर्ने अवैध सामान नेपालगन्ज बजार क्षेत्रबाट बरामद भइरहेका छन् । ‘सशस्त्र प्रहरीसँग नमिलेर अवैध रुपमा सामान ल्याउन सक्ने कुनै सम्भावना रहदैन । सशस्त्र प्रहरीकै मिलोमतोमा अवैध रुपमा सामान भित्रिने गरेको छ,’ एक स्थानीयले अनलाइन खोज खवरलाई भने, ‘हामी सर्वसाधारणले पाँच किलो चामल ल्याउँदा केरकार गर्ने सशस्त्र प्रहरीले यति धेरै परिमाणमा सामान ल्याउँदा नदेख्ने कुरै हुँदैन । यसमा सशस्त्र प्रहरी र तस्करको मिलोमतो छ ।’
सशस्त्र प्रहरीको मिलोमतोमा नाकामा भइरहेको अवैध तस्करी नियन्त्रणका लागि गृह मन्त्रालय, बाँकेका प्रमुख जिल्ला अधिकारी र सशस्त्र प्रहरीको लुम्विनी प्रदेशका डिआइजीले नजर पुर्याउन आवश्यक भएको सर्वसाधारण बताउँछन् । ‘जिल्ला प्रशासन कार्यालयको आधिकारिक फेसबुक पेजमा आफ्नो भनाई राखेर प्रचारबाजी गर्न ब्यस्त प्रमुख जिल्ला अधिकारी श्रवणकुमार पोखरेलले यस विषयमा नजर नलगाउनुले पनि उनको समेत मिलोमतो छ भन्ने बुझिन्छ,’ एक सर्वसाधारणले भने, ‘सशस्त्र प्रहरीका एसपी विमल डाँगी जस्तै सिडिओ साव पनि माल पाएर चुप भएको हुनु पर्छ ।’
Discussion about this post