बाँके बैशाख १२ गते ।
बाँकेको नेपालगन्जस्थित भेरी अस्पतालमा सरकारले निःशुल्क रूपमा उपलब्ध गराउँदै आएको रेबिजविरुद्धको खोप नहुँदा सर्वसाधारण मर्कामा परेका छन् ।
सरकारले निःशुल्क रूपमा उपलब्ध गराउँदैआएको रेबिजविरुद्धको खोप भेरी अस्पतालमा गत चैत २२ गतेदेखि सकिँदा सर्वसाधारणले चर्को मूल्य तिरेर निजी मेडिकल धाउन बाध्य भएका छन् । विपन्न तथा गरिब परिवारका सर्वसाधारणले निजी मेडिकलबाट चर्को मूल्यमा रेबिजविरुद्धको खोप किन्नु पर्दा मर्कामा परेको बताएका छन् ।
“दैनिक ज्याला मजदुरी गरेर परिवारको पेट पाल्दैआएको छु, कुकुरले टोकेपछि निःशुल्क सुई पाइन्छ भनेर यहाँ आएँ, तर यहाँ सुई छैन, किनेर ल्याउन भने ।” कुकुरले टोकेपछि खोप लगाउन भेरी अस्पताल आउनुभएका नेपालगन्ज उपमहानगरपालिका–१७ परसपुरका ४१ वर्षीय यासिन अलिले भन्नुभयो, “मजस्तो दैनिक ज्यालादारी गरेर जीवन चलाउने मान्छेलाई यति महँगोमा सुई किनेर लगाउन पर्दा मर्कामा छु ।”
अलिले अस्पताल बाहिर मेडिकलबाट रेबिजविरुद्धको एउटा खोपको ६ सय २५ रुपियाँ तिरेर किनेको बताउनुभयो । निःशुल्क रूपमा सरकारले प्रदान गर्ने खोपलाई सर्वसाधारणले यति धेरै मूल्यमा किन्नु पर्दा मर्कामा परेको उहाँको भनाइ छ ।
त्यसैगरी राजापुर नगरपालिका–९, इश्वरीगन्ज बर्दियाका हरिलाल थारुले पनि त्यति टाढाबाट नेपालगन्ज आउँदा पनि निःशुल्क खोप नपाउँदा दुःख लागेको बताउनुभयो । “२३ महिनाको यो छोरोलाई बिरालोले हातको औँलामा टोकिदियो, निःशुल्क रेबिजविरुद्धको खोप लाउन पाइन्छ भनेर त्यति टाढाबाट यहाँ ल्याएर आएँ” थारुले भन्नुभयो, “अस्पतालमा खोप सकिएको छ, बाहिरबाट किनेर ल्याऊ भने, मेडिकलबाट ६ सय २५ रुपियाँमा किनेर ल्याएँ । त्यति टाढाबाट यहाँसम्म आउँदा बेकारमा दुःख मात्र पाइयो ।”
नेपालगन्जको भेरी अस्पतालको एआरभी विभागमा कुकुर बिरालाले टोकेका दैनिक एक सयभन्दा बढी सर्वसाधारण नागरिक रेबिजविरुद्धको खोप लगाउन आउनेगरेका छन् । “दैनिक ४० देखि ५० जना नयाँ बिरामीहरू आउँछन्, त्यति नै सङ्ख्यामा पुराना बिरामीहरू पनि आउँछन्, दैनिक सयभन्दा बढी कुकुरले टोकेका बिरामीहरू यहाँ आउँछन्” भेरी अस्पतालका एआरभी विभागका सिनियर अहेब कृष्णबहादुर बुढाथोकीले भन्नुभयो, “अस्पतालमा खोप छैन, सबैलाई बाहिरबाट किनेर ल्याउन भन्छौँ ।”
गत चैत २२ गतेदेखि नै अस्पतालको एआरभी विभागमा रेबिजविरुद्धको खोप सकिएको बुढाथोकीले जानकारी दिनुभयो । कुकरले टोकेपछि तीनवटा रेबिजविरुद्धको खोप लगाउनुपर्ने उहाँले बताउनुभयो ।
अस्पतालमा रेबिजविरुद्धको खोप प्रदेश आपूर्ति केन्द्र र इपिडिमियोलोजी तथा रोग नियन्त्रण महाशाखाबाट आउने गरेको र हाल सो स्थानमा पनि मौज्दात शून्य भएको जानकारी प्राप्त भएको अस्पताल प्रशासनले जनाएको छ । अस्पतालमा खोप उपलब्ध नहुँदासम्म सर्वसाधारणलाई सो सेवा प्रदान गर्न नसकिने अस्पतालले जनाएको छ ।
Discussion about this post