बाँके जेठ २३ गते ।
नेपालगञ्जको वाटरपार्कमा बाढीसम्बन्धी कृत्रिम घटना अभ्यास गरिएको छ । जिल्ला विपद् व्यवस्थापन समिति, बाँकेको आयोजनामा वाटरपार्कमा बाढीसम्बन्धी कृत्रिम घटना अभ्यास गरिएको हो ।
नेपाली सेना, सशस्त्र प्रहरी र नेपाल प्रहरीको टीमले बाढीसम्बन्धी कृतिम घटना अभ्यास गरेका थिए। त्यसमा नेपाली सेनाका ६० जना, सशस्त्र प्रहरीका ४५ जना र नेपाल प्रहरीका २० जना सहभागी भएका थिए। नेपाली सेनाको बज्रदलको यो चौंथो घटना अभ्यास हो।
आजको घटना अभ्यासलाई बज्रदलले ‘अभ्यास मनसुन–४’ नामाकरण गरेको थियो। स्रोतसाधन, क्षमता र जनशक्तिको प्रभावकारी समन्वय गरेर खोज तथा उद्धारलाई प्रभावकारी बनाउन संयुक्तरूपमा बाढीसम्बन्धी कृतिम घटना अभ्यास गरिएको हो। जिल्ला विपद् समितिले बाँकेका विभिन्न प्रकोपबाट २५ हजार घरपरिवार र मनसुनजन्यबाट १५ हजार घरपरिवार प्रभावित हुने आकलन गरेको छ।
नेपालगञ्ज उपमहानगरपालिकाका मेयर प्रशान्त विष्ट, प्रमुख जिल्ला अधिकारी एवं विपद् व्यवस्थापन समितिका अध्यक्ष खगेन्द्र रिजाल, नेपाली सेनाको श्री नं. ४ बाहिनीका बाहिनीपति एवं सहायक रथी रोशनशमशेर जबरा र रेडक्रसका जिल्ला सभापति गोवद्र्धनसिंह सम्झनाले विपद् जतिबेला पनि आउन सक्ने भएकाले यसप्रकारको अभ्यास गरेर साधन, स्रोत र जनशक्तिलाई तयारी अवस्थामा राख्नु पर्ने बताए।कृतिम घटना अभ्यासले आपसमा हातेमालो गरेर अघि बढ्नमा सघाउ पुग्ने उनीहरूको भनाइ थियो।
बाढी सम्बन्धी कृत्रिम घटना अभ्यास कार्यक्रममा बज्रदलका गणपति एवं प्रमुख सेनानी रविन श्रेष्ठ, सहायक प्रमुख जिल्ला अधिकारीद्वय जोरासिंह माझी र लालबहादुर गुरुङ, एसपी तुलबहादुर कार्की, सशस्त्रका एसपी विमल डाँगी, राष्ट्रिय अनुसन्धानका उप अनुसन्धान निर्देशक ओमबहादुर खड्कालगायतको उपस्थिति थियो।
Discussion about this post