बाँके असार १२ गते ।
बाँकेको प्रहरी प्रमुखको कमाण्ड सम्हालेपछि एसपी तुलबहादुर कार्की नेतृत्वको टोलिले अपराधमा संलग्नहरुलाई धमाधम पक्राउ गर्दै कानुुनी कारवाहीको दायरमा ल्याउन थालेको छ । पछिल्लो समय चोरी तस्करी गर्ने, लागु पदार्थ करोवारमा संलग्न भएकाहरु, फरार अभियुक्तहरु पक्राउ परिरहेका छन् ।
आजमात्रै बाँकको राप्तिसोनारी गाँउपालिका–८ ढकेरी शम्सेरगञ्जस्थित सडकखण्डमा शंकास्पद रुपमा हिडिरहेका ३ जना भगवान गौतम बुद्धको मूर्तिसहित पक्राउ परेका छन् ।
पक्राउ पर्नेमा, जिल्ला रुपन्देही तिलोत्तमा नगरपालिका–११ बस्ने बर्ष ५० को खिम बहादुर कुवर, सोही ठाउँ बस्ने बर्ष ५० को रामु न्यौपाने र जिल्ला दाङ घोराही उपमहानगरपालिका–१५ बस्ने बर्ष ५८ को निम बहादुर कुवर रहेका छन् ।
शंकास्पद रुपमा हिडिरहेका तिनै जनालाई सोधपुछ गरी खानतलासी गर्दा निजहरु मध्येका खिम बहादुर कुवरले पछाडी बोकेको खैरो रङको झोला खोली हेर्दा ओम नम (शिवाया) लेखेको भगवान गौतम बुद्धको मुर्ती फेला पारी बरामद गरेको जिल्ला प्रहरी कार्यालय बाँकेका प्रहरी प्रवक्ता डिएसपी नारायण डाँगीले जानकारी दिए ।
पक्राउ गरी उनीहरूमाथी थप अनुसन्धान भइरहेको प्रहरीले जनाएको छ ।
गत जेठ महिनामा बाँके प्रहरीले विभिन्न अपराधसम्बन्धी एक सय ७२ वटा मुद्दा दर्ता गरेको छ भने विभिन्न मुद्दामा संलग्न एक सय २७ जना अभियुक्तलाई पक्राउ गरी कानुनी दायरामा ल्याएको छ । त्यसैगरी, १८ वर्ष दुई महिना २९ दिन कैद सजाय तोकिएका ४४ जना फरार अपराधीलाई पक्राउ गरिएको र उनीहरुबाट २३ लाख ७९ हजार दुई सय ७४ रुपियाँ जरिवानासमेत असुल गरिएको प्रहरीले जनाएको छ ।
यसै समयअवधिमा ६३ वटा पेण्डिङ मुद्दाहरु फर्छ्यौट गरिएको छ । चार सय ९९ वटा ठाडो उजुरी दर्ता भएकोमा तीन सय ५१ वटा उजुरी फर्छ्यौट गरिएको, १५ वटालाई सम्बन्धित निकायमा पठाइएको र एक सय ३३ वटा उजुरी फर्छ्यौट प्रक्रियामा रहेको डिएसपी डाँगीले जानकारी दिए ।
यसैगरी भारतीय सिमानासँग जोडिएको बाँके जिल्लामा केही समययता विभिन्न प्रकारका लागूऔषधको ओसारपसार, सेवन र बिक्री बढ्दै गएपछि प्रहरीले “लागूऔषध दुर्व्यसन तथा ओसारपसारविरुद्धको एकीकृत अभियान–२०८१” सञ्चालन गरेको छ । लागूऔषधविरुद्धको सो अभियान अन्तर्गत प्रहरीले यहाँस्थित नेपाल–भारत सीमानाका जमुनाहमा विशेष सतर्कता अपनाउनुका साथै विभिन्न नाका, बसपार्क र सार्वजनिक स्थलमा प्रहरी परिचालन गरेर चेकजाँचमा कडाइ सुरु गरिएको प्रहरी कार्यालय बाँकेले जनाएको छ ।
अपराध नियन्त्रणमा एसपी कार्की आफै खटिने गरेका छन् । पछिल्लो समय जिल्लामा शान्ति सुरक्षाको अवस्थामा सुधार आएको आम नागरिकहरुले महसुस गरेका छन् ।
Discussion about this post