सौहार्द वातावरणमा मोहर्रम सम्पन्न गर्न सहयोग गर्ने विभिन्न ब्यक्तिलाई सम्मान

बाँके साउन २ गते ।
नेपालगन्जमा धम्बोझी मोहर्रम समितिले मोहर्रम पर्वलाई व्यवस्थित र सौहार्द वातावरणमा सम्पन्न भएको भन्दै सहयोगी सवैलाई धन्यवाद दिएको छ ।
सद्भाव र एकताको सन्देश कायम गर्दै मोहर्रम सफलतापूर्बक सम्पन्न भएको भन्दै मोहर्रम सफल पार्न जुलुसमा अहोरात्र खटिएर समाजिक कार्य गर्ने समाजसेवी, सद्भावकर्मी, सामाजिक अगुवा, सुरक्षा निकायका प्रमुख, पत्ररकार लगायतलाई समितिले धन्यवादसहित सम्मान गरेको छ ।

ताजिया विसर्जन कार्यक्रम कार्यक्रम अघि त्रिवेणी मोडमा आयोजित कार्यक्रममा धार्मिक, सामाजिक सद्भाव समितिका राष्ट्रिय अध्यक्ष दिपक राजपुत लोध, बाँकेका प्रमुख जिल्ला अधिकारी खगेन्द्रप्रसाद रिजाल, बाँकेका प्रहरी प्रमुख एसपी तुलबहादुर कार्की, सशस्त्र प्रहरी गण बाँकेका प्रमुख एसपी विमल डाँगी, नेपाली सेनाको बज्रदल गणका गणपति रविन श्रेष्ठ, राष्ट्रिय अनुसन्धान कार्यालय बाँकेका प्रमुख, जिल्ला ट्राफिक प्रहरी कार्यालय बाँकेका प्रमुख प्रहरी निरीक्षक गोपीकृष्ण सुवेदी, वडा प्रहरी कार्यालय नेपालगन्जका प्रमुख प्रहरी निरीक्षक हरिवहादुर विसी, लगायतलाई सम्मान गरिएको समितिका अध्यक्ष मेराज अहमद हल्वाईले जानकारी दिए ।

सो अवसरमा मोहर्रमलाई सभ्य, भब्य र सुब्यवस्थित बनाउन संचार मार्फत महत्वपूर्ण भूमिका निर्वाह गरेको भन्दै समितिले अनलाइन खोजखबरलाई पनि सम्मान गरेको छ । समितिले नेपाल पत्रकार महसंघ बाँके शाखाका कार्यसमिति सदस्य तथा अनलाइन खोजखबरका प्रकाशक/सम्पादक जावेद अन्सारी, संवाददाता वसिम अन्सारी, नयाँ पत्रिका दैनिकका बाँके सम्बाददाता विश्वराज पछल्डङ्ग्या, गोरखापत्रका बरिस्ठ पत्रकार सिराज खान, नेपाल टेलिभिजनका रुद्र सुवेदीलाई पनि सम्मान गरेको छ ।

बाँकेका प्रमुख जिल्ला अधिकारी खगेन्द्रप्रसाद रिजालले सबैको सहयोग र सहकार्यका कारण शान्तिपूर्वक मोहर्रम समापन हुन सकेको बताए । उनले समाजमा शानित कायम गर्न भूमिका खेल्ने नागरिक समाज, अन्तरधार्मिक सामाजिक सञ्जाल, सुरक्षाकर्मीलगायतलाई धन्यबाद दिए । सम्मानित भएपछि प्रतिक्रिया दिँदै नेपाल टेलिभिजनका रुद्र सुवेदी सुवेदीले सम्मानले शान्ति, सद्भाव र भ्रातृत्वका लागि कलम चलाउन थप हौसला तथा उर्जा मिलेको बताए । उनले सामाजिक एवम् धार्मिक सद्भावले मात्र समाजमा शान्ति स्थापना हुने धारणा राखे ।