बाँके साउन २० गते ।
बाघ संरक्षणका लागि स्थापना गरिएको बाँके राष्ट्रिय निकुञ्जका वन्यजन्तुले गत आर्थिक वर्षमा जिल्लाका ४५७ किसानको खेती र पशु धनमा क्षति गरेको निकुञ्जले जनाएको छ ।
बाँके राष्ट्रिय निकुञ्जका प्रमुख संरक्षण अधिकृत मनोजकुमार शाहका अनुसार गत आर्थिक वर्ष २०८०–८१ मा निकुञ्ज र सो वरिपरिका वन्यजन्तुबाट पशुधन क्षतिका १८१ घटना र अन्नबाली क्षतिका २७२ घटना भएका थिए । चितुवाको आक्रमणबाट चार जना घाइते भएका थिए । उनले अघिल्लो आर्थिक वर्ष २०७९–८० मा ३६४ जना किसान वन्यजन्तुबाट पीडित बनेको जनाउँदै गत आर्थिक वर्षमा निकुञ्जमा जनावर समेत वृद्धि भएकाले पीडित हुनेहरूको संख्या उल्लेख्य बढेको बताए ।
यसैबिच वन्यजन्तुबाट पीडित मध्यवर्ती क्षेत्रका ४५७ किसानलाई क्षतिपूर्ति वितरण गरिएको निकुञ्जले जनाएको छ । गत आर्थिक वर्ष २०८०–८१ मा एक वर्षको अवधिमा अन्नबाली र पशुधन क्षति भएका जिल्लाका ४५७ किसानलाई ३० लाख १८ हजार ४१० रुपियाँ क्षतिपूर्ति वितरण गरिएको निकुञ्जका प्रमुख संरक्षण अधिकृत शाहले बताए ।
उनका अनुसार एक वर्षको अवधिमा बाँके राष्ट्रिय निकुञ्जको मध्यवर्ती क्षेत्रमा चितुवा आक्रमणबाट सामान्य घाइते भएका दुई सर्वसाधारणलाई एक लाख २३ हजार ८१० रुपियाँ क्षतिपूर्तिबापत उपलब्ध गराइएको छ । निकुञ्जका अनुसार पशुधन क्षतिका १८१ घटनामा १८ लाख २५ हजार ३०० र अन्नबाली क्षतिका २७२ घटनामा १० लाख ६९ हजार ३०० रुपियाँ क्षतिपूर्ति वितरण गरिएको छ ।
Discussion about this post