बाँके भदौ २७ गते ।
काँग्रेस–कम्यूनिष्टका कारण देश बर्बादीको दिशामा धकेलिएको जनता समाजवादी पार्टी नेपाल (जसपा नेपाल) का अध्यक्ष उपेन्द्र यादवले दावी गरेका छन् । जसपा नेपालले विहीबार नेपालगन्जमा आयोजना गरेको ‘जनतासँग जसपा नेपाल ः आधारभुत संगठन निर्माण अभियान’ कार्यक्रमलाई सम्बोधन गर्दै उनले प्रत्यक्ष निर्वाचित कार्यकारी राष्ट्रपतिको ब्यवस्था नभएसम्म देशमा राजनीतिक अस्थिरता कायमै रहने जिकिर गरे । ‘प्रत्यक्ष निर्वाचित कार्यकारी राष्ट्रपतिको ब्यवस्था नभएकै कारण तीन–तीन महिनामा सरकार फेरबदल भइरहेको छ । संविधान संशोधन गरि प्रत्यक्ष निर्वाचित कार्यकारी राष्ट्रपतिको ब्यवस्था गरेमात्र वर्तमान राजनीतिक अस्थिरता हट्ने छ,’ उनले भने ।
प्रजातन्त्र पुनस्र्थापना भएको ३५ वर्षसम्म काँग्रेस–कम्यूनिष्टले शासन गरेको बताउँदै उनले ति दलका कारण देशमा लुटतन्त्र, कमिसनतन्त्र, घुसतन्त्र मौलाएको बताए । उनले पञ्चायति ब्यवस्थामा संचालनमा रहेका जनकपुर चुरोट कारखाना, भृकुटी कागज कारखाना, गोरखकाली टायर उद्योग, उदयपुर सिमेन्ट कारखाना लगायतका उद्योग, कलकारखाना काँग्रेस–कम्यूनिष्टले ध्वस्त बनाएको जिकिर गरे । ‘प्रजातन्त्र पुनस्र्थापना भएदेखि हालसम्म काँग्रेस–कम्यूनिष्टले शासन गरेर सरकारी स्वामित्वमा रहेका ठूला–साना उद्योग कलकारखाना बेचेर खाए,’ उनले भने, ‘यो अवधिमा काँग्रेस–कम्यूनिष्टले शासन गरेकोले देशको अर्थतन्त्र धरासायी भएको छ । यसको सम्पूर्ण जिम्मा यी दलले लिनु पर्छ ।’
निजीकरणको नाममा सरकारी स्वामित्वमा रहेका कलकारखानालाई निजीकरण गर्ने नाममा निजी क्षेत्रलाई मोटाउने काम गरेको उनको भनाई छ । सरकारी विद्यालय छन्, तर ति विद्यालयमा पढाई हुँदैन । सरकारी अस्पताल छन्, तर त्यहाँ चिकित्सक र औषधि पाइदैन । खेतीपाती गर्न चाहने किसानहरु रासायनिक मल नपाउने अवस्था छ,’ उनले भने, ‘काँग्रेस–कम्यूनिष्टकै कारण देश दलदलमा फस्दै गएको छ ।’
उनले सात प्रदेश अब्यवहारिक बताएको जिकिर गर्दै संविधान संशोधन गरेर मधेसी, जनजाति, दलित र अल्पसंख्यकको अधिकारी स्थापित गर्नुपर्ने धारणा राखे । ‘अहिलेको सात प्रदेश अब्यवहारिक छ । तराईका जिल्लालाई टुक्रयाएर प्रदेश बनाउने कार्य त्रुटीपूर्ण छ ।संविधान संशोधन गरि यसलाई सच्याउने बेला भएको छ,’ यादवले भने ।
उनले काँग्रेस–कम्यूनिष्टका कारण देशमा बेरोजगारी सिर्जना भएको उल्लेख गर्दै दैनिक १० हजार यूवा कामको खोजीमा विदेश पलायन भइरहेको दावी गरे । ‘काँग्रेस–कम्यूनिष्टका कारण देशका ७५ लाख यूवा खाडीमुलुक र अन्य देशमा भड्किन बाध्य भएका छन्,’ उनले भने ।
उनले मधेस आन्दोलन, थरुहट, दलित, जनजाति आन्दोलनको मर्म विपरित काँग्रेस–कम्यूनिष्टले राज्य संचालन गरिरहेको आरोप समेत लगाए । उनले मधेसी, थारु, दलित, जनजाति आन्दोलनले दिएको उपलब्धि विपरित काँग्रेस–कम्यूनिष्ट अघि बढिरहे देशमा अर्को विद्रोह हुने ठोकुवा गरे । ‘मधेस आन्दोलन, थरुहट, दलित, जनजाति आन्दोलनले दिएको उपलब्धिको बेवास्ता गरिए त्यसबाट निम्तिने परिणामको जिम्मेवारी काँग्रेस–कम्यूनिष्टले लिनुपर्ने छ,’ पूर्व मन्त्री समेत रहेका अध्यक्ष यादवले भने ।
कार्यक्रममा जसपा नेपालका केन्द्रिय सचिव कमरुद्धिन राई, लुम्विनी प्रदेश सभा सदस्य अम्विका काफ्ले, नरैनापुर गाउँपालिकाका अध्यक्ष सैयद इस्तियाक अहमद शाह, केन्द्रिय सदस्य बेबि तबस्सुम अन्सारी लगायतले मन्तब्य राखेका थिए । सो अवसरमा जसपा नेपालका जिल्ला समिति र विभिन्न विभाग गठन समेत भएको जसपा नेपालका केन्द्रिय सचिव कमरुद्धिन राईले जानकारी दिए ।
Discussion about this post