बाँके असोज १६ गते ।
बाँकेको हुलाकी राजमार्ग अन्तर्गत कम्दीस्थित राप्ती नदीको सिधनियाघाट नजिकको सडक निर्माण नहुँदा आवागमनमा समस्या भएपछि स्थानीय बासिन्दा समस्यामा परेका छन्। कम्दी मिलनचोकदेखि राप्ती पुलसम्मको करिब एक किलोमिटर सडक अति नै जीर्ण बनेर खुल्डामा परिणत भएपछि आवागमनमा निकै समस्या भइरहेकोले सो सडक निमार्णको ठेक्का लिएको निर्माण कम्पनीले समयमै निर्माण कार्य सम्पन्न गर्न नसक्दा स्थानीय बासिन्दा मर्कामा परेका हुन्।
हुलाकी राजमार्ग अन्तर्गत मिलन चोकदेखि पुलसम्मको सो सडकखण्ड निर्माणका लागि विगत लामो समयदेखि स्थानीयवासी र जनप्रतिनिधिले माग गर्दै आए पनि सम्बन्धित पक्षले कुनै चासो नदेखाएको स्थानीय बासिन्दाको आरोप छ। सो सडक जीर्ण भएका कारण सवारी साधन आवागमनमा समस्या र दैनिक दुर्घटनाको जोखिम बढ्दै गएको जनाउँदै नरैनापुर गाउँपालिकाका अध्यक्ष ईस्तियाक अहमद शाहले सात दिन भित्र सो सडक निर्माण नगरे हुलाकी सडकमा नै अनशन बस्ने घोषणा गरेका छन् ।
उनले छिटो सडक निर्माणका लागि पटकपटक गरिएको अनुरोधको बेवास्ता भएको बताउँँदै सडकको दुरवस्थाका कारण दैनिक रुपमा दुर्घटना हुँदै आएकोले ७ दिनभित्रै सडक निर्माण नगरे हुलाकी सडकमा नै अनशन बस्ने बताए । उता, हुलाकी राजमार्ग निर्देशनालय नेपालगन्जका प्रमुख लीला भण्डारीले नरैनापुर गाउँपालिकाका अध्यक्षसँग समस्या समाधानका लागि कुराकानी तथा सरसल्लाह भइरहेको बताए ।
उनले उक्त सडकलाई ग्राबेल गरी यात्रुलाई ओहोरदोहोर गर्न सहज बनाउनका लागि यथाशीघ्र काम थालिने प्रतिबद्धता व्यक्त गरे । सडक डिभिजन कार्यालय नेपालगन्जका प्रमुख नरेन्द्र भट्टले राप्ती पुलको छुउमा हुलाकी सडक जीर्ण बनेपछि स्थानीयले सास्ती खेप्नुपरेको स्वीकार गर्दै राप्ती नदीको पूर्वी खण्डमा पर्ने निर्माणाधीन पुलको निर्माणका लागि ठेक्का पाएको लुम्बिनी–रौताहा वन्दना भगवती जेभी कन्ट्रक्सन प्रालिको ढिलासुस्तीका कारण सडक निर्माण हुन नसकेको उल्लेख गरे । हुलाकी राजमार्ग निर्देशनालयसँग समन्वय गरी तीन दिनभित्रै सो सडकको निर्माण गरिने उनले बताए ।
Discussion about this post