बाँके असोज १६ गते ।
दसैँ, तिहार र छठ पर्वलाई मर्यादित र शान्तिपूर्ण बातावरणमा सम्पन्न गर्न बाँके प्रहरीले संवेदनशील क्षेत्रका पहिचान गरि सुरक्षा योजना बनाएको छ । जिल्लाका विभिन्न संवेदनशील क्षेत्रको पहिचान गरि सोही अनुसार प्रहरी परिचालन गरिएको बाँकेका प्रहरी प्रमुख एसपी तुलबहादुर कार्कीले बताए ।
उनले दसैँ, तिहार र छठ पर्व मनाउन आउने र जाने सर्वसाधारणको सुरक्षालाई मध्यनजर गरि जिल्लाको तीन ठाउँमा सहायता कक्ष (हेल्प डेस्क) संचालनमा ल्याएको बताए । ‘सर्वसाधारण यात्रुलाई सुरक्षित रुपमा गन्तब्यसम्म पुर्याउन र लुटिन तथा ठगिनबाट जोगाउन यात्रुको बढि चाप हुने ठाउँमा हेल्प डेस्क संचालनमा ल्याइएको छ,’ उनले भने ।
उनका अनुसार, नेपालगन्जको जमुनाहा नाका, बस पार्क र कोहलपुरस्थित बस पार्कमा हेल्प डेस्क संचालनमा ल्याइएको छ । उनले दसैँ र तिहारलाई लक्षित गरि बाँकेमा एक हजार प्रहरी परिचालन गरिएको बताए । ‘संवेदनशील ठाउँमा निगरानी बढाउन र कुनै घटना घटेको खवर पाउने वित्तिकै १५ मिनेटमा प्रहरी पुग्ने ब्यवस्था मिलाइएको छ,’ उनले भने, ‘दसैँ, तिहारका बेला चोरी बढ्ने भएकोले यो अवधिभर पैदल र गाडीबाट गस्ती गर्ने ब्यवस्था मिलाएका छौँ ।’
उनले सादा पोशाकका प्रहरीले पनि निगरानी गरिरहेको बताए । प्रहरीसँगै तालिम प्राप्त कुकुरबाट पनि चेकजाँच भइरहेको उनको भनाई छ । ‘जमुनाहा नाका र राँझा एयरपोर्टमा तालिम प्राप्त कुकुरबाट जाँच भइरहेको छ,’ उनले भने, ‘उछृंखल गतिविधि गर्ने समुह र ब्यक्तिको पहिचान गरि निगरानी गरिरहेका छौँ । दसैँ, तिहार र छठलाई मर्यादित बनाउन र शान्त बातावरणमा सम्पन्न गर्न हरसम्भवको प्रयास जारी राखेका छौँ ।’
नेपालगन्ज लगायत बाँकेका विभिन्न ठाउँमा प्रतिष्ठापन गरिएका दुर्गामूर्तीको सुरक्षाका लागि समेत संयन्त्र बनाएर सोही अनुसार प्रहरी परिचालन गरिएको उनले बताए । ‘दुर्गामूर्तीको सुरक्षा गर्ने थप जिम्मेवारी बाँके प्रहरीलाई छ । यसको लागि संयन्त्र निर्माण गरि काम भइरहेको छ,’ एसपी कार्कीले भने ।
Discussion about this post