बाँके असोज २३ गते ।
दसैँ मनाउन जानेहरुको नेपालगन्जस्थित बसपार्कमा भीडभाड थियो । यात्रुहरुलाई गन्तब्यमा पुग्न हतार थियो । कोही बसको खोजीमा थिए त कोही बस छुट्ने प्रतिक्षामा थिए । त्यहि बेला बसपार्कमा भित्रिए लभ र ब्यूटी । अपराधिको खोजीमा बसपार्क पुगेका यी दुई मान्छे नभई कुकुर हुन् । अपराधि खोज्न नेपाल प्रहरीले यी कुकुरलाई तालिम दिएको छ ।
दसैलाई लक्षित गरि जिल्ला प्रहरी कार्यालय बाँकेले नेपालगन्जमा हुनसक्ने अपराधलाई मध्यनजर गरि तालिम प्राप्त कुकुर परिचालन गरेको बाँकेका प्रहरी प्रमुख एसपी तुलबहादुर कार्कीले बताए ।
उनले बसपार्कबाट बाहिरिने र भित्रिने सबैलाई नेपाल प्रहरीको तालिम प्राप्त कुकुर लभ र व्यूटीले चेकजाँच गरेको बताए । जिल्ला प्रहरी कार्यालय बाँके, तालुक कर्णाली प्रदेश प्रहरी के–नाइन शाखा सुर्खेत (हाल कोहलपुर), वडा प्रहरी कार्यालय नेपालगन्ज र बसपार्कको संयुक्त टोलीले चेकजाँच गरेको उनले बताए । ‘अपराधमा संलग्न ब्यक्तिको खोजी र अपराध हुन सक्ने खतरालाई मध्यनजर गरि तालिम प्राप्त कुकुरसहित प्रहरीले बसपार्कमा सर्च गरेको हो,’ उनले भने ।
यसअघि तालिम प्राप्त कुकुरसहित प्रहरीले नेपाल–भारत सीमा नाका जमुनाह, नेपालगन्ज विमानस्थल र कोहलपुर बपार्कमा चेकजाँच गरेको उनले बताए । बिस्फोटक पदार्थबाट हुन सक्ने आपराधिक घटना घट्न नदिन र लागु औषध भित्रिन नदिन तालिम प्राप्त कुकुरसहित चेकजाँच गरिएको उनको भनाई छ । ‘भारतबाट नेपाल तर्फ र नेपालबाट भारत तर्फ आवतजावत गर्ने सवारी साधन, विमानस्थल र बसपार्कमा रहेका यात्रुलाई संयुक्त रुपमा चेकजाँच गरिएको छ,’ एसपी कार्कीले भने । लभ र ब्यूटीले भारतबाट बसपार्कमा आउने मानिस, सवारी साधनलाई चेकजाँच गरेका थिए ।
चाडपर्वको मौकामा अपराधिक घटना हुन सक्ने आंशकामा बाँके प्रहरीले विभिन्न रणनीति बनाएर चेकजाँचलाई तीब्र पारेको उनले बताए ।
तालिम प्राप्त दुई वटा कुकुरको नेतृत्व प्रहरी निरीक्षक विष्णु पौडेले गरेका हुन् । चाडपर्वलाई लक्षित गरि बाँके प्रहरीले विशेष सुरक्षा योजना लागू गरेको छ ।
Discussion about this post