बाँके कात्तिक २ गते ।
जिल्ला प्रहरी कार्यालय बाँकेले चालु आर्थिक वर्षको असोज महिनासम्मको कार्य प्रगति विवरण सार्वजिनक गरेको छ । आफ्नो आधिकारिक फेसबुक पेजमार्फत जिल्ला प्रहरी कार्यालयले कार्य प्रगति विवरण सार्वजनिक गरेको हो ।
प्रहरीका अनुसार यो अवधिमा ३८ लाख ७८ हजार २०० रुपैयाँ बराबरको भन्सार छलिको अवैध सामान बरामद गरिएको छ । जसमा दुई वटा मोटरसाइकल र चार जना मानिस पनि पक्राउ परेको प्रहरीको तथ्यांकमा उल्लेखछ ।
यसैगरी प्रतिवन्धित ३ लाख ८८ हजार २०० भारतीय रुपैयाँ पनि बरामद गरिएको छ । बरामद गरिएको रकम थप कारवाहीका लागि राजश्व अनुसन्धान कार्यालय कोहलपुरमा बुझाइएको बाँकेका एसपी तुल बहादुर कार्कीले बताए । यो अवधिमा जिल्ला प्रहरी कार्यालयमा ११९ वटा मुद्दा दर्ता भएकोमा १०७ जना व्यक्तीलाई पक्राउ गरी कानुनको दायरामा ल्याइएको पनि एसपी कार्कीले बताए ।
यस्तै २५ वटा पेण्डिङ मुद्दा फस्र्यौट गरिएको छ । ६११ वटा ठाडो उजुरी परेमा ४४७ वटा फस्र्यौट भएका छन् भने बाँकी ९३ वटा उजुरी फस्र्यौटको प्रक्रियामा रहेका छन् । ५२ जना फरार अपराधि पक्राउ परेका छन् । जसबाट १० वर्ष ११ दिन कैद र १ लाख २४ हजार ८५९ रुपैयाँ जरिवाना असूल उपर गरिएको पनि प्रहरीले जनाएको छ । महिला तथा बालबालिकासँग सम्वन्धीत ११ वटा उजुरी दर्ता भएकोमा ७ जनालाई पक्राउ गरी कानुनी दायरामा ल्याइएको प्रहरीले जनाएको छ ।
यस्तै घरेलु हिंसासँग सम्वन्धीत ३९ वटा उजुरी प्राप्त भएकोमा २२ वटा फस्र्यौट भएको र बाँकी अनुसन्धानको प्रक्रियामा रहेको पनि एसपी कार्कीले बताए । यो अवधिमा २५ वटा उजुरी हराएका महिला, बालबालिका तथा जेष्ठ नागरिकको खोजीका लागि परेका छन् । जिल्लाको शान्ति सुरक्षा मजवुत बनाउने सवालमा प्रहरीले कहिकतै कसर बाँकी नराखेको एसपी कार्की बताउँछन् ।
उनले अपराधमा संलग्न भएकाहरु धमाधम पक्राउ परिरहेको पनि उल्लेख गरेका छन् । कोहलपुरमा व्यक्ति हत्या गरी फरार भएकादेखि बलात्कार घटनामा संलग्न भएकाहरु पक्राउ परिसकेको पनि उनले बताए ।
Discussion about this post