बाँके कात्तिक १९ गते।
नेपालगन्ज उपमहानगरपालिका ४ बसपार्क बाईपास रोडस्थित मानसरोवर दोहोरी साँझ नजिक दुई मोटरसाइकल एक आपसमा ठोक्किँदा मृत्यु भएका अमनकुमार कसौधनका आफन्तले न्यायको माग गर्दै आज भेरी अस्पताल अगाडी प्रदर्शन गरेका छन् ।
चारबाहिनी चोक, भेरी अस्पताल गेट र नेपाल टेलिकम अगाडी टायर बालेर प्रदर्शन गरेका मृतकका आफन्तले न्यायको माग गरेका हुन् ।भेरी अस्पताल र प्रहरीले घाइतेसँग पैँसा खाएर मोटरसाइकल चालक एहसान शेषलाई भगाएको मृतक कसौधनका आफन्तजनले आरोप लगाएका छन् । मृतकका परिवारले न्याय नपाउँदासम्म आन्दोलन जारी रहने उनीहरुले चेतावनी समेत दिएका छन् ।
मृतक कसौधनका आफन्तले टायर बालेर प्रदर्शन गरेपछि बाँकेका प्रहरी प्रमुख एसपी तुलबहादुर कार्की समेत प्रदर्शन स्थल पुगेका थिए । उनले मोटरसाइकल चालक शेषलाई उपचाररत अस्पतालमा गएर भेट्ने र डिसचार्ज हुने अवस्थाको भए नियन्त्रणमा लिएर नेपाल ल्याउने प्रतिवद्धता जनाएपछि आन्दोलन रोकिएको बताए ।
उनले दुर्घटना भएकोले यसलाई दुवै पक्ष बसेर सहमति गरिने बताउँदै मोटरसाइकल चालक शेषलाई कानुन बमोजिम कारवाही प्रक्रिया अगाडी बढाइने बताए । ‘भारतमा गएर घाइतेको अवस्था बुझ्ने र डिसचार्ज हुने अवस्थाको भए नियन्त्रणमा लिएर नेपाल ल्याउने सहमति पछि प्रदर्शन स्थगित भएको छ,’ अनलाइन खोजखबर संग एसपी कार्कीले भने ।
उक्त दुर्घटनामा नेपालगन्ज उपमहानगरपालिका ६ मा डेरा गरी बस्ने २६ वर्षीय अमनकुमार कसौंधन (गुप्ता) को मृत्यु भएको थियो भने नेपालगन्ज उपमहानगरपालिका ११ का १८ वर्षीय एहसान शेख गम्भीर घाइते भएको बाँके प्रहरीले जनाएको छ । घाइते शेखको उपचार नेपालगन्जस्थित भेरी अस्पतालमा हुन नसकेपछि थप उपचारका लागि भारतको लखनऊ लगिएको जिल्ला प्रहरी कार्यालय बाँकेले जनाएको छ ।
नेपालगन्ज उपमहनपालिका ४ बाइपासबाट गणेशपुरतर्फ जाँदै गरेको भे ६ प ८०२ नम्बरको मोटरसाइकल र विपरित दिशाबाट आएको ज ३ प ७१७१ नम्बरको मोटरसाइकल एक आपसमा ठोक्किएका थिए । घाइते शेखको मुख, आँखा र शरिरको भित्रि भागमा चोट लागेको छ ।
Discussion about this post