बाँके मंसिर १९ गते ।
बाँकेको नेपालगन्ज उपमहानगरपालिकाले १० करोड बढी खर्चेर हनुमानको मूर्ति निर्माणको काम भइरहेको छ । नेपालगन्ज उपमहानगरपालिका–२ हनुमानगढीमा १०८ फिट अग्लो हनुमानको मूर्ति निर्माण भइरहेको हो । सिभिल इन्जिनियर सुरज शर्माका अनुसार १० करोड ११ लाख ५२ हजार ४ सय ९४ रुपैयाँ २९ पैसामा ठेक्का सम्झौता भई मूर्ति निर्माणको काम भइरहेको हो ।
सन् २०२३ को १७ मार्चमा मूर्ति निर्माणको सम्झौता भएको थियो। जम्बुदिप कन्स्ट्रक्सन प्रालि बसुन्धरा काठमाडौंले दुई वर्षभित्र काम पूरा गर्ने गरी निर्माणको जिम्मा लिएर काम गरिरहेको छ । हालसम्म फाउन्डेसन र प्लेटफर्मको काम सकिएको छ। हनुमान मूर्तिको खुट्टाको पैंताला निर्माणको काम वर्षाअघि नै सकिएको उनले बताए । ‘यो बीचमा मूर्तिकार खोज्दा केही ढिला भएको हो,’ उनले भने, ‘अहिले विदेशी मूर्तिकारको सल्लाहमा कन्ट्र्याक्टमा पोखरका मूर्तिकारले द्रुत गतिमा मूर्ति निर्माणको काम गरिरहेका छन्।’
फाउन्डेसन लगायतको ठूलो काम सकिएको हुँदा अब मसिनो काम बाँकी रहेको र त्यो द्रुत गतिमा भइरहेको इञ्जिनियर शर्माले जानकारी दिए । ‘अब एकदमै मसिनो गरी काम सुरू भएको छ,’ उनले भने, ‘अब हामीले एक÷एक मिटरमा ढलान गर्दै फर्मा निकाल्दै काम गरिरहेका छौं।’ सिभिल इन्जिनियर शर्माले हनुमानको खुट्टाको ढलानको काम पनि पूरा भइसकेको भए पनि कलाकारिताको मसिनो काम गर्नुपर्ने भएका कारण काम पूरा हुन तोकिएको समयभन्दा केही ढिला हुन सक्ने र त्यसका लागि म्याद थप्नुपर्ने अवस्था आउन सक्ने आँकलन गरे ।
नेपालगन्ज–२ का वडाध्यक्ष मनोजकुमार श्रेष्ठले बागेश्वरी मन्दिरको एक सय मिटरको दुरीमा अहिले हनुमानको विशाल मूर्ति निर्माण गर्नुले नेपालगन्जलाई धार्मिक पर्यटकीय क्षेत्रको रूपमा विकास गर्न सहज हुने बताए । पहिले ‘बाल्दा तलाउ’ भएको ठाउँमा हनुमानका मूर्ति र चिल्ड्रेन पार्क निर्माणको काम भइरहेको तथा यो निर्णय आफूहरू आउनुभन्दा अघि डा. धवलसम्शेर राणा मेयर हुँदा कै निर्णय भएको उनले बताए ।
हनुमानको मूर्ति निर्माणका लागि भुटान र राजस्थानबाट मूर्तिकार झिकाइएको तथा उनीहरू समेतको सल्लाहपछि अहिले कास्की पोखराका एक जना मूर्तिकारलाई रोजिएको मेयर प्रशान्त विष्टले बताए । नेपालगन्ज उपमहानगरपालिकाले हनुमानको मूर्ति निर्माण गर्ने र त्योबाहेक बाहिरी आवरण, सजावट, चिल्ड्रेन पार्क लगायतका अन्य संरचना निर्माणका लागि लुम्बिनी प्रदेशका पर्यटन मन्त्री प्रचण्ड विक्रम न्यौपानेलाई आग्रह गरिएको मेयर विष्टले जानकारी दिए ।
Discussion about this post