बाँके मंसिर २१ गते ।
नेपालगन्ज उपमहानगरले ई–रिक्सा ब्यवस्थापनमा चासो नदिएको भन्दै ई–रिक्सा ब्यवसायी आक्राशित भएका छन् । ई–रिक्सा संघर्ष समितिले शुक्रवार नेपालगन्जमा आयोजना गरेको पत्रकार सम्मेलनमा संघर्ष समितिका अध्यक्ष रियाज अहमद शेषले बताए ।
उनले ई–रिक्सा ब्यवस्थापनको नाममा नेपालगन्ज उपमहानगरका मेयर र उपमेयरले गरिव, निमुखा ई–रिक्सा ब्यवसायीसँग घुस लिएको आरोप लगाए । उनले नविकरणको नाममा ई–रिक्सालाई जिल्ला प्रशासन कार्यालय प्रांगनमा लगेर थन्क्याएर विचौलियामार्फत मोटो रकम असुलेको बताए । ‘ई–रिक्सा चलाएर एक छाक जोहो गर्नेहरुसँग रकम माग्ने र नदिए एक्जाभेटरले थिचेर नष्ट गर्दा सयौँको रोजीरोटीमा लात मार्ने काम उपमहानगरका मेयर र उपमेयरले गरेका छन् । मेयर र उपमेयरले पैँसा लिएकै कारण एक जना ई–रिक्सा चालकले आत्महत्या गर्न पर्यो,’ उनले भने ।
अध्यक्ष शेषले आफ्ना मागहरु तत्काल सम्बोधन नगरिए ई–रिक्साको संघर्ष समितिले चरणबद्ध आन्दोलन गर्ने चेतावनी समेत दिए । ई–रिक्सा समस्या समाधानका लागि संघर्ष समितिले केहि दिनअघि आफ्ना मागहरु नेपालगन्ज उपमहानगर र बाँके प्रशासनमा बुझाएको थियो । गरिब तथा दैनिक परिश्रम गरेर जीविकोपार्जन गर्नेहरुमाथि भइरहेको अन्यायका बिरुद्ध संघर्ष समिति गठन गरिएको उनको भनाई छ । ‘माग बेलैमा सम्बोधन नगरि सशक्त आन्दोलन गर्न बाध्य हुने छौँ । आन्दोलनबाट उत्पन्न परिस्थितिको सम्पूर्ण जिम्मेवारी नेपालगन्ज उपमहानगरले लिनुपर्ने छ,’ शेषले भने ।
नेपालगन्ज उपमहानगरपालिकाले अन्य कहिँ नभएको कानून लादेको संघर्ष समितिको आरोप छ । ई–रिक्सा चालकको समस्याका बारेमा उपमहानगरपालिकाका मेयर र उपमेयरलाई बारम्बार जानकारी दिँदासमेत सुनुवाई भएको छैन,’ उनले भने, ‘नेपालगन्ज उपमहानगरका मेयर र उपमेयरले हामीमाथि अन्यायमात्र गरेका छैनन् हाम्रो पेटमा लात हान्ने काम गरेका छन्,’ शेषले भने ।
एक वर्ष अघि उपमहानगरपालिकाले महिनौदिन लगाएर अबैध भनेर नियन्त्रणमा लिएको रिक्सा धनीसँग विचौलिया लगाएर पैँसा असुलेको उनको आरोप छ । ‘बिचौलियामार्फत अबैध भन्दै नियन्त्रणमा लिइएको प्रति ई–रिक्साबाट १५–३० हजारसम्म असुल गरेर बैध बनाउने काम मेयर र उपमेयरले गरे,’ उनले भने ।
Discussion about this post