बाँके मंसिर ३० गते ।
ठुला तस्करसँग लाइन लिएर मोटो रकम असुलिरहेको सशस्त्र प्रहरी बल ३० नम्बर गण बागेश्वरीका सशस्त्र प्रहरीले थोरै सामान ल्याउँदै गरेका सर्वसाधारणलाई त्रसाउन कुटपिटमा उत्रिएका छन् । बाँकेका विभिन्न विओपी मार्फत रकम उठाउँदै आएको गणले सर्वसाधारणलाई कुटपिट गरेर त्रसाउने गरेको छ । यसको प्रत्यक्ष उदाहरण आइतवार दिउँसो देखाएको छ । सशस्त्र प्रहरी बल ३० नम्बर गण बागेश्वरी अन्तरगत चौलिका चोकमा खटिएका सशस्त्र प्रहरीले सर्वसाधारणलाई निर्घात कुटपिट गरि घाइते बनाएपछि सशस्त्र प्रहरीको हर्कत बाहिरिएको छ ।
भारतको रुपइडिहाबाट सामान किनमेल गरि फर्किदै गरेका छोरालाई लिन चौलिका चोक पुगेका नेपालगन्ज उपमहानगरपालिका १७ परस्पुरका नन्कु साहुलाई निर्घात कुटपिट गरि घाइते बनाएको पीडितले बताए । ‘स्कुल विदा भएकोले सामान लिन छोरा रुपइडिहा गएको थियो । घरायसी सामान लिएर आउँदै गर्दा चौलिका चोकमा सशस्त्र प्रहरीले रोकेपछि जानकारी लिन म त्यहाँ पुग्दा सामान्य विवादमा सशस्त्र प्रहरीले बुटले अण्डकोष र छातीमा हिर्काए । निरन्तर हिर्काएपछि बेहोस भएर म जमिनमा ढलेँ,’ उनले भने, ‘बेहोस भएकै बेला सशस्त्र प्रहरीले आफ्नो गाडीमा हालेर मलाई भेरी अस्पताल पुर्याए । अण्डकोषको दुखाई केहि कम भए पनि छातीको चोट अझैँ उस्तै छ ।’
अवैध रुपमा सामान ल्याउँदै गरेको सामान नियन्त्रणमा लिएर भन्सार कार्यालयमा बुझाउने अधिकार सशस्त्र प्रहरीलाई भए पनि हातपात गर्ने अधिकार सशस्त्र प्रहरीलाई छैन । तै पनि ठुला तस्करसँग भइरहेको तालमेलमाथि छारो हालेर घरायसी सामान ल्याउनेमाथि सशस्त्र प्रहरीले हातपात गर्ने हर्कत गर्न थालेको छ । ‘हातपात गर्ने अधिकार कसैलाई छैन । सशस्त्र प्रहरीले मानव अधिकारको हनन् गरेको छ । हातपात गर्ने सशस्त्र प्रहरीलाई कानुन बमोजिम कारवाही हुनु पर्छ,’ चौलिका चोकमा भेटिएका एक प्रत्यक्षदर्शीले भने ।
पछिल्लो समय बाँकेका प्रमुख जिल्ला अधिकारी (सिडिओ) समेतको मिलोमतोमा सशस्त्र प्रहरीले तस्करी गराउँदै आएको प्रत्यक्षदर्शी बताउँछन् । कार्यअवधि सकिने बेला भएकोले सशस्त्र प्रहरी बल ३० नंं. गण बागेश्वरीका गणपति एसपी विमल डाँगी कमाउ धन्दामा लागेको एक उच्च स्रोतले जनाएको छ । उनकै निर्देशनमा घरायसी सामान ल्याउने सर्वसाधारणलाई कुटपिट गर्ने र सामान खोस्ने गरिएको छ । ‘ठुलालाई लाइन दिएर सानालाई त्रसाउने र कुटपिट गर्ने यो सशस्त्र प्रहरीको कमाउ धन्दा गर्ने उपाय बाहेक केहि होइन,’ एक सर्वसाधारणले भने, ‘एसपी डाँगी अहिले कसरी कमाउन सकिन्छ भन्ने दाउमा हुनुहुन्छ ।’
बाँकेको नाकामा खटिएका विओपी इन्चार्जले एसपी डाँगीलाई मासिक रुपमा रकम बुझाउँदै आएका छन् । मासिक रकम नबुझाउने इन्चार्जलाई उनले फिर्ता बोलाउने र मन परेको प्रहरी अधिकृतलाई मात्र विओपी इन्चार्ज बनाउने गरेको समेत खुलेको छ ।
सवैको अगाडी बुटले हिर्काउने सशस्त्र प्रहरीलाई आफूले नचिनेको नन्कुले बताए ।
तरकारी किनेर फर्किदै गरेका छोरालाई लिन चौलिका चोक गएका बेला ड्यूटीमा खटिएका सशस्त्र प्रहरीले कुराकानीकै क्रममा खुट्टा र हातले अण्डकोष तथा छातीमा हिर्काएर घाइते बनाएको उनले बताए । ‘सशस्त्र प्रहरीका एक जना आएर बुटैबुटले अण्डकोष र छातीमा हिर्काए,’ उनले भने ।
सशस्त्र प्रहरीको कुटाईबाट बेहोस भएका नन्कुलाई सशस्त्र प्रहरीले आफनै गाडीमा राखेर उपचारका लागि भेरी अस्पताल पुर्याइएको छ । सशस्त्र प्रहरीको कडा सुरक्षाका वीच उहाँको भेरी अस्पतालको इमरजेन्सी वार्डमा उपचार भइरहेको छ । घाइते नन्कुको उपचारमा सशस्त्र प्रहरीको जम्बो टोली भेरी अस्पताल बाहिर खटिएको छ ।
घर खर्चका लागि सामान ल्याउने क्रममा सशस्त्र प्रहरीले सामान खोसेपछि विवाद भएको थियो । संवेदनशील अंगमा बुटले हिकाउँदा अचेत भई लडेपछि प्रत्यक्षदर्शीले बिरोध गरेका थिए । सुरक्षाकर्मीको अमानविय व्यवहारको बिरोध भएछि दम्पतीलाई नै भ्यानमा राखेर पुर्याउनुले सशस्त्र प्रहरीको दोष छ भन्ने पुष्टि भएको छ ।
यसअघि पनि सामान्य विवादमा चौलिका चोकमा खटिएका सशस्त्र प्रहरीले एक सर्वसाधारणलाई कुटपिट गर्दा एउटा आँखा गुमेको थियो ।
यस बिषयमा सिडिओसँग पटक–पटक बुझ्न खोज्दा उनले प्रयोग गर्दै आएको सरकारी नम्बरको मोवाइल फोन उठेन ।
Discussion about this post