बाँके पुस २२ गते ।
बाँकेको खजुरा गाउँपालिकाको खजुरा प्रज्ञा प्रतिष्ठानले साहित्यमा रुचि राख्नेहरूलाई नेपाली भाषाको साहित्यबारे जानकारी गराउने उद्देश्यले सञ्चालन गरेको विधागत प्रशिक्षण सम्पन्न भएको छ ।
खजुरा गाउँपालिका लगायतका सय जना साहित्यका विद्यार्थी र साहित्यबारे सिक्न चाहनेहरूको सहभागिता रहेको सो प्रशिक्षणमा नेपाली भाषा साहित्यका विद्वान व्यक्तित्वहरू प्राडा. घनश्याम न्यौपाने, डा. गोविन्द आचार्य र डा. इन्द्रबहादुर भण्डारीले लोक संस्कृति र लोक साहित्य, गीत सङ्गीत, कथा लेखन, निबन्ध लेखन, गजल मुक्तक लेखन, गद्य कविता, छन्द कविता लेखनको बारेमा प्रशिक्षण दिनुभएको खजुरा प्रज्ञा प्रतिष्ठानले जनाएको छ ।
खजुरा प्रज्ञा प्रतिष्ठानका उपकुलपति डा. इन्द्रबहादुर भण्डारीका अनुसार सो तालिममा सहभागी अधिकांशले साहित्यको क्षेत्रमा लाग्ने प्रतिबद्धता जनाउनुका साथै साहित्यबारे तालिमबाट धेरै कुरा सिकेको जनाएका छन् । दुई दिनसम्म चलेको सो तालिममा गित सङ्गीत, कथा लेखन, निबन्ध लेखन, गजल मुक्तक लेखन, गद्य कविता र छन्द कविता लेखनका बारेमा सैद्धान्तिक ज्ञान दिनुका साथै प्रयोगात्मक रूपमा लेख्न लगाई सच्याइएको खजुरा प्रज्ञा प्रतिष्ठानका सदस्य मणि अर्यालले बताए ।
कार्यक्रममा बोल्दै खजुरा गाउँपालिकाका अध्यक्ष तथा खजुरा प्रज्ञा प्रतिष्ठानका कुलपति डम्बर विकले साहित्यको विकास र विस्तारका लागि खजुरा प्रज्ञा प्रतिष्ठानले विभिन्न कार्यक्रम गर्ने तथा खजुरालाई साहित्यको पालिकाको रूपमा चिनाइने बताए । यसअघि पनि खजुरा प्रज्ञा प्रतिष्ठानले साहित्य सम्बन्धि विभिन्न कार्यक्रम गरेर साहित्यकारहरूको उत्साह बढाएको खजुरा प्रज्ञा प्रतिष्ठानका उपकुलपति डा. इन्द्रबहादुर भण्डारीले बताए ।
Discussion about this post